Поездда кетаётиб аҳамият берсангиз, айрим метро станциялари меъморлик санъати намунаси деб аталишга муносиб эканлигини пайқайсиз. Қуйида дунёдаги энг гўзал метро бекатлари билан таништирамиз.
“Ююан боғи”, Шанхай
Шанхайнинг энг чуқур метро бекати шаҳарнинг сайёҳлар марказида жойлашган. Икки йил аввал музей каби ажойиб бекат тўлиқ таъмирлаш ва реставрациядан ўтди ва ўзининг замонавий қиёфасини олди. Нью-Йорклик дизайнер ва меъморлар метро устида оқиб ўтадиган Хуанпу дарёсининг кўринишидан илҳомланиб, метро бекатини “сув тўлқинлари” услубида лойиҳалаштирган.
“City Hall”, Нью-Йорк
1904 йилда очилган метро бекати шаҳарнинг энг гўзал масканига айланиши керак эди. Метро шаҳар ҳокимиятининг қоқ остида жойлашган, шунинг учун станция дизайнига алоҳида эътибор қаратилган. Платформа ўша пайтдаги мода — арт-деко услубида безатилган. Шохли қандиллар, витраж ва плиткалар — буларнинг барчаси ҳалигача Нью-Йорк метросининг кўрки саналади.
Аммо шаҳар йилдан йилга кенгайиб борди, вақт ўтиши билан мазкур платформа йўловчи поездларининг янги стандартларига жавоб бермай қолди. Шунинг учун станция 1945 йилда ёпилган. Баъзи фильмлар айнан шу бекатда суратга олинган.
“Майаковская”, Москва
Москваликлар учун “Майаковская” бекати энг севимли метро бўлиб, сўнгги йилларда у энг гўзал ва романтик станция номига эга бўлди. Гарчи у 86 йил аввал очилган бўлса-да, бугунги кунда ҳам жуда футуристик кўринишини сақлаб қолган.
Авваллари кашф этилмаган хай-тек дизайнини эслатиб юборадиган мазкур бекат ўз даври учун ноёб бўлган меъморий лойиҳа бўлган. Метро очилишидан аввал ҳам кўпчиликнинг диққатини тортган ва 1937 йилда станция Париждаги Бутунжаҳон кўргазмасида эътироф этилган. Объект Нью-Йоркдаги халқаро кўргазмада Гран-прига сазовор бўлган.
“Westfriedhof”, Мюнхен
Мазкур бекат биргина детал барча нарсани ўзгартириши мумкинлигига яққол мисолдир. “Westfriedhof” 1998 йилда очилган одатий кулранг тусли метро бекати эди. Аммо икки йил ўтгач, платформага қизил, сариқ ва кўк чироқли 11 та улкан лампалар ўрнатилди. Деворлар эса кўк ва бинафша рангда ёритилди.
Бекат шу қадар гўзал ва сирли масканга айландики, ундан ҳатто мунтазам равишда реклама агентликлари томонидан фотосессиялар учун фойдаланилади. 2010 йилда станциянинг ички қисми Британиянинг The Haggis Horns гуруҳига тегишли янги альбомининг муқовасидан жой олди.
“Толедо”, Неаполь
Мазкур метро бекатидаги ажойиб шакллар, пухта ўйланган ёруғлик манбалари ва миллионлаб оқ ва кўк мозаикалар йўловчиларда сувости дунёси ёки муз қироллигига келиб қолгандек ҳиссиётни беради. “Толедо” шаҳар метро бекатларини қуриш ва таъмирлаш бўйича Stazioni dell’arte (“Art Stations”) лойиҳаси доирасида машҳур дизайнер ва меъморлар томонидан яратилган.
Янгиланган станция 2013 йилда очилди ва тез орада йилнинг энг яхши жамоат биноси учун нуфузли LEAF архитектура мукофотини олди. Ҳозирда Толедо дунёдаги энг чиройли метро бекатлари рўйхатида юқори поғоналарни эгаллаб бормоқда.
“Солна Cентрум”, Стокгольм
Ғайриоддий кўринишга эга бўлган яна бир метро бекатларидан бири Стокгольмда жойлашган бўлиб, ёрқин рангларга бўялган. Ундаги қизил ранг ботаётган қуёшни, яшил ранг эса ўрмонни англатади.
Бекат 70 йиллардаги Швециянинг муҳим ижтимоий муаммолари — ёмонлашган экология, ўрмонлардаги ёнғин каби воқеаларни акс эттирувчи расмлар билан бойитилган.
“Ёнгван”, Пхеньян
Интернетда Пхеньян шаҳри метросининг фотосуратлари йўқ. Умуман олганда, Шимолий Корея ҳақидаги бошқа маълумотлар ҳам жуда кам. Бироқ “Ёнгван” бекати бундан мустасно бўлиб, унинг турли бурчакдан олинган суратларини кўриш мумкин. Метро қурилишида мамлакат раҳбарияти ўзига хос дизайн учун маблағларни аямаган.
Бекат ичи жуда кенг бўлиб, шоҳона устунлар ва ярим доира гумбазлардан иборат. Деворлари Пхеньяннинг сокин пейзажи тасвирланган расмлар билан безатилган. Бекатнинг асосий диққатга сазовор жойи қандиллардир. Унда Шимолий Кореянинг миллий гули — бегония акс этган.
“Formosa Boulevard”, Гаосюн (Тайван)
“Формоза булварди” номли бекат 2009 йилда Тайванда бўлиб ўтган Жаҳон ўйинлари бошланиши арафасида очилган. Шишасозлик санъатининг энг йирик намоёндаси бўлган бекат “Гумбаз ёруғлиги” деган маънони англатади. Ўзининг ноёб дизайни туфайли станция ҳозирда шаҳарнинг диққатга сазовор масканига айланди.
-vkhnTd1q.jpeg)
Диаметри 30 метр бўлган улкан доира шаклидаги станция сув, олов, тупроқ ва ҳаво рамзи бўлган 4000 дан ортиқ витраж панеллардан ташкил топган. 2014 йилда CNN Travel портали мазкур объектни дунёдаги энг чиройли метро бекатлари рўйхатига киритган.
“Notting Hill Gate”, Лондон
Ҳатто Британия ОАВ ҳам Лондон метроларининг интерери чиройли эмаслигини тан олади. Истисно тариқасида Notting Hill Gate’ни айтиш мумкин. Қуёшли кунларда мамлакатдаги энг қадимий метро бекати платформалари нурга тўлади.
Архитектуранинг ажойиб симметрияси ва қадимийлик уфуриб турган станция150 йилдан ортиқ вақтдан бери аҳолига хизмат қилади.
Изоҳ (0)