17 апрель куни Виктория ўзининг 50 ёшини нишонлади. Туғилган кун шарафига Posh Spice қандай қилиб бир вақтнинг ўзида ҳам ишбилармон аёлга, ҳам ҳақиқий мода тимсолига айлангани ҳақида гаплашамиз.
19 ёшли Виктория Адамс қизлар гуруҳи учун кастинг бўлаётгани ҳақида телефон орқали билиб қолади. “Кейин мен газетадаги эълонни кўрдим, унда янги гуруҳга қўшиқ айтишни ва рақсга тушишни яхши кўрадиган тажрибали, экстроверт қизлар керак, деб ёзилганди”, — дейди у. Аслида Вики қўшиқ айтишни жиддий қабул қилмаган, аммо ёш қиз бундай имкониятни қўлдан бой беришни хоҳламайди: Адамс Лондонга кўчиб ўтишни жуда хоҳлаган. Бундан ташқари, Виктория балет мактаби, театр коллежида таҳсил олганди.
1999 йилда эса Виктория Адамс Виктория Бекҳэмга айланади. Орадан 20 йил ўтган бўлса-да, ҳозирда Бекҳэм шунчаки ажойиб фамилия эмас, унинг орқасида сайёрадаги энг машҳур футболчининг катта оиласи туради. Бекҳэм жуда кучли бренд бўлиб, у ҳар қандай маҳсулотни сотишга қодир: кийим-кечак коллекциясидан тортиб шотланд вискисигача.
Кўп жиҳатдан, бу муваффақият Бекҳэмлар оиласининг бошлиғи Девиднинг хизматларидир, аммо унинг севимли рафиқаси Викториянинг ажойиб муваффақиятисиз бунга эришиб бўлмасди.
Хатоларини тан олишни билади
Викториянинг аввалги услуби ҳеч қачон идеал бўлмаган. Карьерасининг бошида, яъни Spice Girls даврида Адамс хоним “олигархнинг рафиқаси” образидан уқувсизларча фойдаланган: калта ва тор либослар, ёрқин олмослар, мукаммал дазмолланган сочлар, ёрқин макияж ва, албатта, баланд пошнали туфлилар.
Негадир мен латексдан тикилган костюмлар кийишни одатий ҳол деб ҳисоблардим. Ромеога ҳомиладорлигимда ҳам доимо пошнали туфлиларда юрардим. Тўққиз ойлик ҳомиладорлигимда Диснейлендни “лабутен”да айланганимни эслайман, — дейди у.
Кейинчалик Виктория имплантларидан халос бўлади, терисидаги автозагарини кетказади ва барча тор кийимларини ташлаб юборади. Бунинг ўрнига катта ўлчамдаги, ёрқин бўлмаган кийимларга устунлик беради. Ҳатто Елизавета II ҳам Викториянинг мода соҳасидаги ютуқларини юқори баҳолайди ва набираси Уилям орқали Бекҳэм хонимга Британия империясининг ордени ва зобити унвонини топширади.
Ўзининг кучли томонларини таъкидлай олади
Виктория ўзининг осонгина таниб олинадиган услубини яратди. Қайсидир маънода Виктория Бекҳэмни Коко Шанель билан солиштириш мумкин: машҳур француз аёли буржуа модасига эргашиш учун имкониятга ҳам, маблағга ҳам эга бўлмаса-да, бутун дунё унга эргашди. Викториянинг пули ҳам, хоҳиши ҳам етарли эди. Унга фақат етишмаётган нарса ўзига хослик бўлган.
Виктория паст бўйли (165 сантиметр) бўлгани учун ҳам баланд пошнали пойабзалларда юрган. Бекҳэм хоним биринчи оёғи синишигача пошнали туфлиларда юришни давом эттириш ўрнига, бўйининг пастлиги унинг хусусияти, қадр-қиммати ва кучи эканлигини тушунади. Буни пошнали туфли билан кўтаришнинг ҳожати йўқ — у ўзини ўзи борича қабул қиладиган аёлга айланади.
Ҳозирда у нозиклигини бутунлай бошқа турдаги кийимлар билан таъкидлайди. Мини узунликдаги юбкалар узунлашиб, тўкилиб турувчи мидига айланди, платформали пошналар узун этикларга, кўзлари атрофини смоки услубида бўяш эса терининг табиий ёрқинлигига ўз ўрнини бўшатиб берди. Аммо Бекҳэм хонимнинг либосларидаги бир нарса ўзгаришсиз қолмоқда — бу унинг қуёшдан сақлайдиган катта кўзойнакларга бўлган муҳаббати: бу аксессуар қуёшдан ҳам, папарацциларнинг камераларидан ҳам мукаммал ҳимоя қилади.
Кечиришни билади
Ёш, чиройли, муваффақиятли жаноб Бекҳэм ва Бекҳэм хоним 2000 йилларда намунали оиладек туюларди. Бироқ Девиднинг хиёнати билан боғлиқ оилавий муаммолар бор эди.
Биринчи хиёнат тўйларидан беш йил ўтиб юз беради: 2004 йилда Девид шахсий ёрдамчиси Ребекка Лус билан Викторияга хиёнат қилган. Аммо Девид рафиқаси билан ажрашишни хоҳламайди. Виктория ҳам ҳисобсиз кўз ёшларидан сўнг, бевафо эрини кечиради.
Девиднинг иккинчи хиёнати уч йилдан кейин ошкор бўлади. Бу сафар бош қаҳрамон Ирма Ничи эди. Қиз Девид билан муносабатларини яширмасликка қарор қилади ва Бекҳэм бир кеча учун 10 минг доллар тўлаганини айтади. Унинг сўзларига кўра, бу муносабт бир кечада тугамаган, балки улар ўртасидаги романтикага айланган.
Кейинчалик маълум бўлишича, унинг сўзлари уйдирма бўлиб, бу муносабатлар суд жараёни билан якунланган. Одатда бундай ҳикояларда содир бўлганидек, футболчи ва қўшиқчининг никоҳи сақлаб қолинади, Ничининг обрўси тўкилгани қолади, холос.
Ҳеч ким турмуш қуриш осон, деб айтмаган. Муаммолар Девид билан ҳикоҳимизни янада мустаҳкамлади, — дейди Виктория ва эри тарафини олади.
Бошқаларнинг фикрига эътибор бермайди
Виктория бошқалар у ҳақида нима деб ўйлашига аҳамият бермайди — бу унинг муваффақиятининг асосий сирларидан бири. Сўнгги 20 йил ичида матбуот мумкин бўлган ҳамма нарса учун уни танқид қилди: анорексия тарғиботи ва жуда нозик моделлар билан ишлашдан тортиб қизи Харперни тарбиялашда гендер стереотипларигача.
Бекҳэм танқидчиларининг яна бир севимли нишони — унинг ҳиссиз юз ифодасидир. Викторияни фақат интернетдаги фотосуратлардан танийдиганлар уни бутун оиласини очликда сақлайдиган ва қаттиққўллик қиладиган совуқ, ҳиссиётсиз аёл деб ўйлашади. Виктория ҳақиқатан ҳам кўп табассум қилмайди, лекин буни жиддий қабул қилмаслик керак: Викториянинг ўзи унинг бундай юз ифодаси образининг деталларидан бири эканини айтади.
Мен ичимда доим табассум қиламан. Лекин ташқи кўринишимда бундай бўлолмайман, мода оламидаги ҳамкасбларим олдидаги мажбуриятларим бор, — дейди у.
Актриса Ева Лонгория дугонасини ҳимоя қилади: Аслида у жуда қувноқ. У жуда кўп табассум қилади ва энг муҳими, мени ҳам кулдира олади.
Янгиликларни синаб кўришдан қўрқмайди
Викториянинг қўшиқчилик карьераси, Spice Girls’нинг бошқа етакчи хонандаларидан фарқли ўлароқ муваффақиятли бўлмаган бўлса ҳам, ҳозир у энг машҳур номга эга. Бунинг сири нимада? Виктория фақат мусиқага эътибор бермасдан, ўзини бошқа соҳаларда синаб кўришдан тортинмади.
Аввало Posh Spice мода дизайнери сифатида танилди. Унинг арсеналида нафақат ўзининг Victoria Beckham бренди, балки Виктория Бекҳэмнинг иккинчи, демократик йўналишдаги Victoria by Victoria Beckham ҳам мавжуд. Бренд ўз тарихини 10 йил олдин, Виктория кечки либослар тўплами Victoria Beckham Collection’ни тақдим этганида бошланган эди. Аммо бундан олдин ҳам Вики эри билан dVb — David and Victoria Beckham номи остида ички кийимлар, жинси шимлар ва парфюмерия ишлаб чиқарадиган бренд яратганди.
Аввалига танқидчилар бу ғояга шубҳа билан қарашади: “Мана, яна бир юлдуз ўзини дизайнер деб эълон қилди!”. Виктория бошида жуда кўп пул ва машҳур номга эга эди, лекин у бизнес муваффақиятли бўлишига ишончи комил эмасди. Бекҳэм хонимнинг бахтига унинг шахсий дизайнлари юқори баҳоланди. Бугунги кунда унинг услуби яхши сотилмоқда: нуфузли Business of Fashion нашрига кўра, Виктория Бекҳэм бренди 100 миллион долларга баҳоланган.
Шунингдек, Виктория бир нечта парфюмерия чиқарди, китоб ёзди, ҳатто машина моделини лойиҳалаштирди. Бундан ташқари, Бекҳэм заргарлик буюмлари тармоғини ишлаб чиқди ва 2017 йил охирида у Estée Lauder учун декоратив косметика тўпламини чиқарди.
Бугунги кунда Бекҳэм хонимнинг машҳурлиги “футболчининг рафиқаси” мақомидан ҳам ошиб кетди, асосийси эса барча ютуқларини ўз меҳнати билан қўлга киритди. Ишларидан ташқари эри ва тўрт фарзанди — Бруклин, Ромео, Круз ва Харпер учун ҳам вақт топиши эса таҳсинга сазовор.
Изоҳ (0)