Эроннинг “Истиқлол” клубида тўп сураётган ўзбекистонлик футболчи Жалолиддин Машарипов жиддий жароҳат олди. Журналист Александр Троицкийнинг хабар беришича, футболчининг тиззасидаги пайлардан бири узилиб кетган. Шу сабабли у йил охиригача майдонга туша олмаслиги мумкин.

Манбаларга кўра, Машарипов бу жароҳатни Туркияда ўтган мавсумолди йиғинида олган. Бироқ унга нотўғри ташхис қўйилган, шунинг учун футболчи оғриққа қарамай машғулотларни давом эттирган. Теҳронга қайтгач, ҳолат янада оғирлашган.
Футболчининг ўзига атиги 10 кунлик тикланиш кераклиги айтилган бўлса-да, аслида жароҳат анча жиддий бўлиб чиққан. Бу эса “Истиқлол” клуби бош мураббийи Рикардо Сапинтони жаҳлини чиқарган. У клуб шифокорларига норози эканлигини билдирган.
Маълумотларга кўра, Машарипов йил охиригача қайдномадан чиқарилади. Сабаби унинг тўлиқ тикланиши учун узоқ вақт талаб этилади. Бу дегани, Машарипов катта эҳтимол билан 28 августдан 8 сентябрга қадар Ўзбекистон ва Тожикистон майдонларида бўлиб ўтадиган CAFA Nations Cup-2025 мусобақасини ўтказиб юборади.
Эслатиб ўтамиз, аввалроқ “Истиқлол” сафидаги яна бир ўзбекистонлик футболчи Рустам Ашурматов ҳам жароҳат сабаб узоқ вақтга сафдан чиққани ҳақида хабар берилган эди.
Изоҳ (0)