Грузия собиқ президенти Михаил Саакашвили Алексей Навалнийни Россиянинг бўлажак президенти деб атади. Сиёсатчи ўзининг Facebook’даги саҳифасида тегишли постни қолдирди.
Саакашвили шу тариқа Навалнийнинг яқинда Грузия собиқ президентини даволаниш учун қамоқдан озод қилиш ҳақидаги чақириғига жавоб қайтарди.
“Менинг фикримча, яқинда Россиядан қоладиган бўлажак президент Алексей Навалний билан менинг иккита умумий жиҳат бирлаштиради: иккаламиз ҳам коррупция билан тенг даражада муросасизмиз ва Владимир Путиннинг асосий душманимиз”, — дейди Грузия собиқ президенти.
Шунингдек, у Навалнийга “омон қолиш, озод бўлиш ва кўзланган мақсадга эришишни” тилаган.
Қамоқдаги Грузия собиқ президенти Саакашвилининг саломатлиги кескин ёмонлашган. Сиёсий маҳбус ҳозир ҳаёт-мамот ёқасида эканини таъкидлаган. У қийноқда ўлиши Путиннинг ғалабаси бўлишини қайд этганди.
Саакашвилини Грузияда ҳибсга олиш ва қийноқлар
2021 йил 1 октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Vivamedи тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)