Украина президенти Владимир Зеленский Грузия собиқ президентининг ижтимоий тармоқларда пайдо бўлган суратларига изоҳ берар экан, “Россия ҳозирда Украина фуқароси Михаил Саакашвилини Грузия ҳукуматининг қўли билан ўлдирмоқда” деди.
Зеленский Украина расмийлари Грузияни Саакашвилини Киевга топширишга бир неча бор чақирганини эслатди. Бу сафар, президентнинг сўзларига кўра, у ташқи ишлар вазири Дмитрий Кулебага Грузиянинг Украинадаги элчисини чақириб, унга кескин норозилик билдиришни ҳамда раҳбарияти билан маслаҳатлашиш учун мамлакатни тарк этишни таклиф қилишни буюрган.
“Мен яна бир бор Грузия ҳукуматини Украина фуқароси Михаил Саакашвилини зарур даражада даволаниш ва парвариш учун Украинага топширишга чақираман. Ҳамкорларимизни бу ҳолатни эътиборсиз қолдирмасликка ва бу инсонни қутқаришга чақираман. Европада ҳеч бир куч одамларни қатл қилишга ҳақли эмас, инсон ҳаёти Европанинг асосий қадриятидир”, — деди Зеленский ўз постида.
3 июль куни Саакашвили 2007 йилдаги митингни куч билан бостириш бўйича унга қарши қўзғатилган иш кўриб чиқилаётган суд мажлисида видеоалоқа орқали иштирок этди. Суд залидан олинган кадрларда 2021 йил октябрь ойидан бери ҳибсда сақланаётган Грузиянинг собиқ президенти қанчалик озиб кетганини кўриш мумкин.
Бундан ташқари, собиқ президентнинг укаси Давид Саакашвили Михаил “вазн йўқотишда давом этаётганини ва ўлимга қараб кетаётганини” айтди. Шунингдек, у Михаил Саакашвилини заҳарлашгани эҳтимолини инкор этмади.
- Михаил Саакашвили 2021 йилнинг кузидан бери ҳибсда. У чегарани ноқонуний кесиб ўтиб, Грузияга қайтганидан кейин қўлга олинган. Қамоқхонада Саакашвилининг соғлиғи сезиларли даражада ёмонлашди. 2022 йил май ойидан бери сиёсатчи Тбилисидаги Vivamed клиникасида. Суд мажлисларида 20 нафар шифокор Саакашвилининг аҳволи оғир эканини айтди.
- 2023 йилнинг февралида Саакашвилининг вазни 67 килограмм экани хабар қилинганди. Ҳибсга олинишидан олдин унинг вазни 116 килограмм, бўйи 195 сантиметр бўлган.
Изоҳ (0)