Бугун, 16 февраль куни россиялик сиёсатчи Алексей Навалний Ямал-Ненецк автоном округидаги 3-сонли ахлоқ тузатиш колониясида вафот этгани хабар қилинди. Россия президенти Владимир Путиннинг асосий мухолифи ҳисобланган Навалнийнинг ўлими айни пайтда бутун дунёнинг диққат марказида бўлиб турибди.
Турли давлат раҳбарлари, сиёсатчилар мазкур воқеага ўз муносабатларини билдиришмоқда.
Жумладан, Украина президенти Владимир Зеленский Навалнийни Путин ўлдирган деб ҳисобламоқда.
“Ҳозиргина Алексей Навалний Россия қамоқхонасида вафот этгани маълум бўлди. Афтидан, у ҳам қийноққа солинган минглаб одамлар каби Путин томонидан ўлдирилган. Путин учун кимнинг ўлиши муҳим эмас, муҳими, у ўз позициясини сақлаб қолса бўлгани. Шунинг учун у мағлуб бўлиши, ҳаммасини йўқотиши ва қилган иши учун жавоб бериши керак”, — деди Украина президенти.
Германия канцлери Олаф Шольц эса мазкур воқеа Россия салбий томонга ўзгарганининг белгиси эканини айтиб ўтди.
“Ҳозирча якуний тасдиқ йўқ, аммо Навалний Россия қамоқхонасида ўлган бўлиши эҳтимоли юқори. Бу биз учун жуда қайғули хабар. Мен у билан заҳарланганидан кейин Германияда даволанаётганида учрашгандим. Навалний билан Россияга қайтиш қарори қандай жасорат талаб қилгани ҳақида суҳбатлашдим. Энди у бу қарори учун ҳаётидан айрилди. Бу қандай режим эканлигини жуда яхши биламиз. Ким танқид қилса, демократия тарафдори бўлса, ўз ҳаётини хавф остига қўйган бўлади.
Унинг хотини, болалари, дўстлари, издошларига ҳамдардлик билдирамиз. Бу шунчаки даҳшатли. Ва бу Россия қандай қилиб салбий томонга ўзгарганининг белгисидир. Афсуски, бу жараён анча олдин бошланган, у аллақачон демократиядан узоқлашган, Россияда демократия қолмаган”, — деди Германия канцлери Олаф Шольц.
Буюк Британия бош вазири Риши Сунак Навалнийнинг ўлимини рус халқи учун катта фожиа, деб атади.
“Бу даҳшатли хабар. Россиянинг энг ашаддий демократия ҳимоячиси сифатида Алексей Навалний бутун умри давомида ақл бовар қилмайдиган жасорат кўрсатди. Мен унинг рафиқаси ва Россия халқига ҳамдардлик билдираман, улар учун бу жуда катта фожиа”, — деди Сунак.
“Алексей Навалнийнинг ўлими барча демократия ва инсон ҳуқуқлари ҳимоячилари учун фожиадир. Унинг оиласига ва Россияда демократия учун курашни давом эттираётганларга ҳамдардлик билдираман”, — деди Грузия Президенти Саломе Зурабишвили.
“Навалний вафот этди” дейиш нотўғри. “Навалнийни Путин ўлдирди” — мана бу тўғри гап бўлади, — деди украиналик сиёсатчи Антон Герашченко.
“Путин Навалнийни тез ва яширинча заҳар билан ўлдиришга уриниб кўрди ва муваффақиятсизликка учради, энди эса уни қамоқда секин ва ошкора ўлдирди. У Путин ва унинг мафиясини фирибгар ва ўғри эканлигини фош қилгани учун ўлдирилган. Мард инсоннинг хотини ва болаларига ҳамдарлик билдираман”, — деди шахмат бўйича собиқ жаҳон чемпиони Гарри Каспаров.
Навалнийнинг онаси эса ўғли вафот этганига ҳали ҳам ишона олмаётганини маълум қилган.
"Мен ҳеч қандай таъзия ҳақида эшитишни хоҳламайман. Биз ўғлимизни 12 февраль куни колонияда кўргандик, у билан учрашгандик. Ўғлим тирик, соғлом ва қувноқ эди", — деди Людмила Навалная.
Изоҳ (0)