Грузиянинг собиқ президенти Михаил Саакашвили унга яратилган барча шароитларга қарамай, нормал овқатланишдан бош тортишда давом этмоқда. Бу ҳақда Грузия адлия вазири Рати Брегадзе брифингда маълум қилди.
“Маҳбус Саакашвили ҳалигача даволаниш курсига тўлиқ риоя қилмаяпти ва шифокорлар тавсия қилган овқатни емаяпти. Биз маҳбусни ҳамда унинг соғайиб кетишидан чин дилдан манфаатдор бўлган одамларни ҳийла-найранглар ўрнига, шифокорлар тавсияларига амал қилишга, шифокорлар айтган миқдордаги ва муайян турдаги таомларни истеъмол қилишга чақирамиз”, — деди Брегадзе.
Вазирнинг айтишича, Саакашвили ўзига ўзи зарар етказяпти. Унга кўра, собиқ президентнинг соғлиғи ўз қўлида, агар одам ўз хоҳиши билан даволанмаса ва фақат ўзи хоҳлаган таомни истеъмол қилса, вазирлик уни еб-ичишга ёки даволанишга мажбурлай олмайди.
Вазирнинг таъкидлашича, Саакашвили даволанаётган “Vivamed” клиникасида унга барча шароитлар яратилган ва унинг барча ҳуқуқлари ҳурмат қилинади.
3 июль куни Саакашвили 2007 йилдаги митингни куч билан бостириш бўйича унга қарши қўзғатилган иш кўриб чиқилаётган суд мажлисида видеоалоқа орқали иштирок этди. Суд залидан олинган кадрларда 2021 йил октябрь ойидан бери ҳибсда сақланаётган Грузиянинг собиқ президенти қанчалик озиб кетганини кўриш мумкин.
Бундан ташқари, собиқ президентнинг укаси Давид Саакашвили Михаил “вазн йўқотишда давом этаётганини ва ўлимга қараб кетаётганини” айтди. Шунингдек, у Михаил Саакашвилини заҳарлашгани эҳтимолини инкор этмади.
Украина президенти Владимир Зеленский Грузия собиқ президентининг озиб кетганига изоҳ берар экан, “Россия Украина фуқароси Михаил Саакашвилини Грузия ҳукуматининг қўли билан ўлдирмоқда” деди.
Изоҳ (0)