Грузия собиқ президенти Михаил Саакашвили Тбилиси шаҳар судининг 2007 йил ноябридаги намойишни тарқатиб юбориш иши бўйича йиғилишида видео алоқа орқали иштирок этди. Бу ҳақда “Мтвари” хабар берди.
Сиёсатчи акс этган кадрларда унинг том маънода таниб бўлмас даражада озганини кўриш мумкин. Михаил Саакашвилининг укаси сиёсатчи ҳибсда худди шундай суръатда вазн йўқотишда давом этса, ўлиши мумкинлигидан хавотирда.
“Ҳақиқатан ҳам вазият яхши эмас, вазн даҳшатли. Михаилнинг вазни неча килограмм эканини айтишга тайёр эмасман, лекин ҳақиқат шундаки, у вазн йўқотишда давом этмоқда ва ўлим томон кетмоқда”, — деди Давид Саакашвили.
Унинг фикрича, акасининг озиши унга жазони ўташ чоғида қўпол муносабатда бўлинганидан, оғир шароитда сақланганидан далолат беради. Бундан ташқари, собиқ президентни заҳарлашга уриниш кузатилган бўлиши мумкинлиги, бу унинг аҳволига таъсир қилгани айтилган.
Давиднинг қўшимча қилишича, бир мунча вақт ўтгач, тарихчилар ҳақиқатни очиб беришади.
Саакашвилини Грузияда ҳибсга олиш ва қийноқлар
2021 йил 1-октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Vivamedи тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)