Президент ёрдамчиси Саида Мирзиёева Ўзбекистонда соғлом турмуш тарзини рағбатлантиришга алоҳида эътибор қаратилишини маълум қилди.
Шавкат Мирзиёев 21 май куни Соғлиқни сақлаш лойиҳалари маркази томонидан амалга оширилаётган ишлар ва янги таклифлар тақдимоти билан танишганди. Унда иштирок этган Саида Мирзиёева президент томонидан соғлиқни сақлаш тизимига оид бир неча муҳим қарорлар қабул қилинганини қайд этди.
Унинг таъкидлашича, бу масалалар анчадан бери муҳокамаларга сабаб бўлаётган эди.
-0XU6fDK1.jpg)
Хусусан, 2024 йилда Тошкентда давлат тиббий суғурталаш механизми ишга тушади. Бу ҳар бир фуқарога турли ҳолатларда тиббий ёрдам олиш имконини беради. Давлат томонидан электрон рецептлар орқали аҳолини дори-дармон воситалари билан таъминлаш дастури яратилади. Фуқароларга бюджет ҳисобидан бепул дорилар берилади.
“Бу харажатларни оптималлаштириб, тиббий ходимларнинг ишини енгиллатиш имконини беради. Натижада маблағларни сарфлаш самарадорлиги ошади”, — дейди Саида Мирзиёева.
Шунингдек, мурожаатларни касалликнинг оғирлик даражасига қараб сараловчи тез тиббий ёрдам тизимини жорий этиш орқали тиббий хизмат кўрсатиш самарадорлиги ва тезкорлиги такомиллаштирилади.
Бундан ташқари, соғлом турмуш тарзини рағбатлантиришга алоҳида эътибор қаратилади.
“Бу ҳар бир инсон биринчи навбатда ўз саломатлиги ҳақида қайғурадиган жамият томон қўйиладиган муҳим қадамдир”, — деди президент маслаҳатчиси.
Шавкат Мирзиёев аҳоли ўртасида мустаҳкам саломатлик гарови бўлган соғлом турмуш тарзини шакллантириш, жисмоний тарбия ва спортни ривожлантиришга алоҳида эътибор қаратилишини айтганди.
Президентнинг “Соғлиқни сақлаш вазирлиги фаолиятини янада такомиллаштириш чора-тадбирлари тўғрисида”ги фармонида 2024—2026 йилларда соғлом турмуш тарзини шакллантириш, тўғри овқатланишни тизимли тарғиб қилиш ва оммалаштириш дастури ишлаб чиқилиши лозимлиги белгиланганди.
Изоҳ (0)