Ўзбекистонда ҳар йили аҳоли вирусли гепатитнинг B ва C турларига скрининг текширувлардан ўтказилиши ҳақида хабар берилган эди. Санитария-эпидемиологик осойишталик ва жамоат саломатлиги қўмитаси ахборот хизмати раҳбари Мафтуна Саидова 2023 йилнинг ҳозирги даврига қадар ўтказилган текширув натижаларини эълон қилди.
Ўзбекистонда ушбу хавфли касалликни ўз вақтида профилактика ва диагностика қилиш, уларни даволаш мақсадида президентнинг 2022 йил 16 майда тегишли қарори қабул қилинган. Мазкур қарорда вирусли гепатитларнинг B ва C турларини эрта аниқлаш учун республиканинг барча ҳудудларида скрининг текширувларини ўтказиш ва касалликни даволаш қамровини ошириш борасида бир қатор муҳим вазифалар белгиланган.
Шундан келиб чиққан ҳолда Ўзбекистондаги 65 дан ортиқ оилавий ва кўп тармоқли марказий поликлиникаларда ушбу касалликни аниқлаш учун бепул скрининг ташкил этилди.
Мафтуна Саидованинг билдиришича, 2023 йилнинг ҳозирги даврига қадар 696 147 нафар аҳоли гепатит B турига ва 696 045 нафар аҳоли гепатит C турига скрининг текширувидан ўтказилди. Улардан 22 307 нафарида гепатит B ва 22 157 нафарида гепатит C турлари аниқланди.
Гепатит C га қарши дори воситалари хариди учун давлат бюджетидан 47 миллиард сўм ажратилиши режалаштирилган.
Миср билан ўтказилган музокаралар натижасида 800 минг қадоқ “Даклатасвир” ва “Софосбувир” дори воситаларини беғараз ёрдам сифатида юбориш учун келишувга эришилди.
Қайд этилишича, ҳозирги кунда 60 000 қадоқ “Даклатасвир” ва 7 000 қадоқ “Софосбувир” дори воситалари гепатит C тури аниқланган беморларга бепул тарқатилмоқда. Ушбу дори воситаларини барча вилоятлар ва Қорақалпоғистон Республикасининг марказий юқумли касалликлар шифохоналарида тарқатилмоқда.
Миср Араб Республикаси томонидан беғараз ёрдам сифатида дорилар олиниши туфайли 35,25 миллиард сўм тежаб қолинади. Ушбу тежаб қолинган маблағлар скрининг текшируви учун йўналтирилади ва скрининг сони йилига 1 миллионга етказилиши режалаштирилган. Бу каби тизимли ишлар давом эттирилмоқда, — дейди Санитария-эпидемиологик осойишталик ва жамоат саломатлиги қўмитаси ахборот хизмати раҳбари.
Изоҳ (0)