Ижтимоий тармоқларда “Ўзбекистон темир йўллари“ АЖ таркибидаги Марказий клиник шифохона ёпилаётгани, ҳозир даволанаётган беморлар ўз ҳисобидан дори-дармонларни сотиб олаётгани ҳақида хабарлар тарқалди. “Ўзбекистон темир йўллари” ҳолатга изоҳ берди.
Унга кўра, “Ўзбекистон темир йўллари” акциядорлик жамияти таркибига қирувчи барча тиббиёт муассасалари, хусусан, президентининг 10 октябрдаги “Ўзбекистон темир йўл транспорти соҳасини тубдан ислоҳ қилиш чора-тадбирлари тўғрисида”ги қарорига асосан ташкил этилган “Темир йўл ижтимоий хизматлар”га тегишли, мамлакатда темирйўлчилар ва аҳолига тиббий хизмат кўрсатиш давом этмоқда.
Хусусан, бугунги кунга қадар 234 бемор даволанмоқда, улардан 139 нафари темирйўл ишчилари, 95 нафари пулли асосда даволанмоқда. Беморларга дори-дармонлар талабномага мувофиқ белгиланган дорилар формулярига асосан шифокор кўрсатмасига биноан бепул берилиб келинмоқда.
Шунингдек, зарур ҳолларда беморнинг касаллик ҳолатига қараб шифокор кўрсатмасига асосан шифохона формуляри рўйхатига киритилмаган дори воситалари Соғлиқни сақлаш вазирлигининг “Тиббиёт ташкилотларида дори воситаларини тайинлаш, халқаро патентланмаган номланиши бўйича рецептларни расмийлаштириш ҳамда беморнинг дори воситаларини қабул қилиш, сақлаш ва қўллаш тартиби тўғрисидаги низомни тасдиқлаш ҳақида”ги буйруғига асосан беморларга рецепт кўринишида ёзиб бериш белгиланган.
Шу билан бирга, бу кунларда даволанаётган беморлар билан суҳбат ўтказилганда шифокорлар томонидан малакали тиббий кўрсатилаётгани, зарур дори-дармонларнинг мавжудлиги, беморхоналар озодалиги ва тиббий ходимларнинг хушмуомалалигини таъкидлаб, ўз миннатдорчиликларини изҳор этди.
“Хулоса қилиб шуни маълум қиламизки, ижтимоий тармоқларда тарқалган, Марказий клиник шифохонанинг ёпилаётгани тўғрисидаги маълумотлар асоссиз”, — дейилади хабарда.
Изоҳ (0)