Собиқ актёр Шерзод Бин “33 савол” YouTube каналига берган интервьюсида АҚШдаги мактаблар ва тиббиётдан кўнгли тўлмаслиги ҳақида гапириб берди.
Америка мактаблари, Шерзод Саидалиев нималарга мослашди-ю, нималарга ҳалигача кўниколмаётгани ҳақида.
— АҚШ университетларида ўқиб, таҳсил олаётган талабалар учун имкониятлар катта. Катта суммалик 100 фоизлик грандларни қоплаб беришади. Бу томони зўр, аммо мактаблари мени хавотирга солади. Сабаби ўзбек менталитетига тўғри келмайдиган дарслари бор. Америкадаги ўзбекларнинг энг оғриқли нуқтаси — мактаб мавзуси. Яқинда Муҳаммадали Эшонқулов келди, Филаделфия штатига таклиф қилдик, вазиятни кўриб, мактаб очиш қарорига келганини айтди. Ҳозир энг кўп ўзбеклар Филаделфияда. Ню Ёркда иш кўп бўлиши мумкин, лекин у ерда яшаш қиммат. Турк, араб, ҳинд ва покистонликларнинг мактаблари бор, лекин ўзбек мактаблари ҳам бўлиши керак, деб ҳисоблайман.
Собиқ актёр АҚШ тиббиётининг яхши ва ҳалигача тушунолмаётган тарафлари ҳақида.
— Америка тиббиётига ҳалигача яхши тушунолмайман. Умумий катта шифохоналари бор, кўп ишимиз тушади. Ўзбекистонда дорихоналардан исталган дорини харид қилоласиз, бу ерда кўп дорилар фақат шифокор кўрсатмаси билангина сотилади, хатто шприц ҳам сотилмайди. Касаллик бошланғич даражада бўлса, кўпроқ табиий усулда даволашади, сув ичиш кераклигини тинимсиз айтишади. Лекин ўйлайманки, бизнинг докторларимиз кучли. АҚШликлар системаси ўчиб қолса, ишлай олмайди, ўзбек шифокорлар эса шам ёқиб бўлса ҳам, беморни қутқариб қолишга ҳаракат қилишади. Лекин америкаликларнинг жарроҳлик операцияларини қилишига қойил қолмай илож йўқ.
Қайнотамни юк машинаси уриб кетганида жуда яхши операция қилишди, кўрмагандек бўлиб кетганлар. Операция қилингандан сўнг уйингизга ҳисоб варағи келади, 10 йилга бўлиб тўлашингиз ҳам мумкин. Мабодо тўлашга имконингиз бўлмаса ҳам, уни давлат ёпиб юборади. Лекин бу кейинчалик кредит олишингизга таъсир қилади.
Ўзбекистонда тез тиббий ёрдам хизмати уйингизга келиши бепул, бу ерда 1200 дан 2000 долларгача бўлади. Аммо бу АҚШ учун у даражада катта харажат эмас. Фарзанд туғилиши эса 10 минг АҚШ долларидан 20 минггача ҳам бўлади. Эгизак бўлса, ундан ҳам нарх ошади. Америкада терапия йўқ. Яъни Ўзбекистондагидек санаторийларни бу ерда кўрмадим. Имконияти йўқлар учун фондлар бор, саҳий инсонлар пул ташлашади. АҚШ аҳолиси саёҳат учун бошқа давлатларга энг кам чиқадиган халқ экан, чунки уларнинг ўзида кўришга арзийдиган жуда кўп жойлари бор. Менга чет элликларнинг доим кулиб туриши ёқади, танимаган одами бўлса ҳам, саломлашиб табассум билан ўтиб кетишади.
Green Card’ни қаерда тўлдириш муҳимми?
— Green Card’ни қаерда тўлдиришингиздан қатъи назар, тўғри тўлдириш керак. Мексика орқали ноқонуний келишни эса умуман тавсия қилмайман. Оилавий келаётганларни эшитамиз, жуда хатарли, дейишади. АҚШга ўтказиб қўйишни ваъда қилиб, аввалига қанчадир пул билан келишиб, кейин икки-уч бараварини талаб қилиб, қийин аҳволларга солиб қўйишади. Дўстона маслаҳатим, келгандан кейин тўғри юриш керак. Бирор жиноят билан қўлга тушиб қолишса, тамом. Бу ерда полиция жуда қаттиқ ишлайди. Депорт қилиб юборишса-ку, майли, лекин қамалган одам чиқиши қийин бўлади.
Изоҳ (0)