Кўп пулга эга бўлиш фақат қиммат ресторанларда овқатланиш ва ниҳоятда соғлом парҳезга риоя қилиш керак, дегани эмас. Баъзи ишбилармонлар қатъий парҳезларни синаб кўрса, бошқалари эса чизбургерларни ёки айримлари якшанба кунлари қуймоқ тайёрлашни хуш кўради.
Дунёнинг энг бой одамлари қандай таомларни тановул қилади? Business Insider журналистлари шу саволни бериб, миллиардерларнинг қандай овқатланиш одатлари борлигини аниқладилар. Рўйхатда Ричард Брансон ва Жек Дорсидан тортиб, Уоррен Баффет ва Илон Маск ҳам бор.
Ричард Брансон, Virgin Group асосчиси
Брансон қора чойсиз яшай олмаслигини айтиб, кунига ўртача 20 пиёла чой ичади. “Мен English breakfast чойисиз қандай яшаган эканман, билмайман”, деган эди у 2016 йилда Daily Mail нашрига.
Virgin Group асосчиси одатда кунини мевали салат ва мюссли билан бошлайди, лекин вақти-вақти билан унинг ўрнига балиқ истеъмол қилади. Унинг сўзларига кўра, суҳбатдошларининг “кўнглини кўтариш” учун иш билан боғлиқ учрашувларни тушлик вақтига белгилашни маъқул кўради. Кечки овқат вақтида тадбиркор одамларни “ҳикояларни баҳам кўриш ва ғояларни топиш” учун бирлаштиришни яхши кўради.
Шунингдек, у оиласи билан мулоқот қилиш учун доим вақт топишини, мунтазам равишда жисмоний машқлар бажаришини, кечки соат 23:00 лар атрофида ва тахминан олти соат ухлашини қўшимча қилган.
Жефф Безос, Amazon компанияси асосчиси
Безос шошмасдан, фойдали нонушта қилишни яхши кўришини айтган бўлса ҳам, кунни экзотик таом билан бошлашга қаршилик қилмаслигини маълум қилди.
Бир куни эрталабки йиғилиш пайтида тадбиркор саккизоёқ билан картошка, саримсоқ ва қайнатилган тухум буюртма қилди. Кейин Безос бу таомни ҳеч қачон татиб кўрмаганини, шунинг учун шу йўл билан нонуштага саккизоёқ ейишга қарор қилганини таъкидлаган.
Унинг севгилиси Лорен Санчес The Wall Street Journal нашрига Безос ҳеч қачон шахсий мураббийи билан машғулотларни ўтказиб юбормаслигини ва ҳар якшанба куни эрталаб қуймоқ пиширишини айтган.
— Ҳар сафар у Бетти Крокернинг рецептлар китобини чиқаради ва мен унга “Сен дунёдаги энг ақлли одам бўлсанг, нега бу рецептни ҳалигача ёдлаб олмадинг?” деб сўраганман, — дейди у.
Билл Гейтс, Microsoft асосчиси
Билл Гейтс Diet Cola’ни жуда яхши кўришини, уни кунига 3-4 марта ичишини айтади. Ошпаз Жорди Круз бир пайтлар Гейтс бутун бир ресторанни икки кунга банд қилганини, лекин фақат Diet Cola буюртма қилганини маълум қилган.
Гейтс эрталаблари Cоcоа Puffs’ни истеъмол қилади. Тадбиркорнинг собиқ рафиқаси Мелиндага кўра, Гейтс одатда нонуштани ўтказиб юборади. Миллиардер чизбургерларни ҳам иштаҳа билан ейди.
Netflix ҳужжатли фильмларининг бирида Гейтс эрийдиган кукунли ичимлик — Танғни жуда яхши кўришини айтади.
Стив Жобс (1955—2011), Apple асосчиси
Уолтер Айзексоннинг таржимаи ҳолида ёзилишича, Жобс баъзан ҳафталар мобайнида бир овқатланишда битта ёки иккита маҳсулотни истеъмол қилган. Бир вақт унинг таомномаси фақат сабзи ва олмадан иборат бўлса, бошқа вақт фақат мева, сабзавот, ёнғоқ, дон маҳсулотларини тановул қилган.
Жобс Айзексонга Рид коллежида ўқиётганда “гўшт истеъмол қилмасликка қарор қилганини” ва кейинчалик сут маҳсулотларини ҳам тўхтатганини айтган.
Шунингдек, китобда ёзилишича, Жобс баъзан бир неча кун маълум вақт давомида овқат емаган. Унинг сўзларига кўра, бу эйфория туйғусини келтириб чиқаради.
2003 йилда Жобсга ошқозоности бези саратони ташхиси қўйилганида, мевали парҳез унга ёрдам беришига ишонган, аммо 5 йилдан кейин у таомномасига балиқ ва бошқа протеинли таомларни киритган. Вафот этишидан аввал асосан суюқ овқатлар парҳезига риоя қилган.
Илон Маск — Twitter, SpaceX, Tesla раҳбари
“Агар овқатланмасам ҳам самарали ишлашим мумкин бўлганда, мен умуман овқат емасдим”, дейди Илон Маск.
Миллиардер одатда нонушта қилмайди. Баъзан Марс батончикларидан ёки “пончик” ейди. Маск иш вақтида тез овқатланади — ёрдамчиси олиб келган ҳамма нарсани беш дақиқада еб қўяди.
Тадбиркор шакарни камайтиришга қарор қилган, аммо у нонуштага ширинлик истеъмол қилиш одатини ўзгартирмаган. Чунки Twitter’да ҳар куни эрталаб “пончик”лар ейиши ҳақида ўртоқлашди. Ва ўтган йили у Diet Cоlа билан тушган расмини твит қилди. Гейтс сингари Маск ҳам бу ичимликни жуда яхши кўради. Ихтирочи 2007 йилларда бир вақтнинг ўзида кунига бу ичимликдан саккиз дона ичган.
2020 йилда Жо Роганга берган интервьюсида Маск мазали таомлардан воз кечишга тайёр эмаслигини тан олган, гарчи бу у камроқ яшашини англаца ҳам.
Бироқ кечки овқатни энди шошилмай тановул қиляпти. Маск барбекю ва француз ошхонасини яхши кўради.
Марк Цукерберг, Меtа раҳбари
2011 йилда Цукерберг фақат ўзи сўйган ҳайвонлар гўштини истеъмол қилишга қарор қилди.
Қайд этилишича, унинг ратционида эчки ва товуқ гўшти ва денгиз қисқичбақаси бор.
Уоррен Баффет, Berkshire Hathaway бош директори
2015 йилда Уоррен Баффет Фортуне нашрига берган интервьюсида у “Coca-Cola’нинг чорак қисми” эканлигини таъкидлаган. Шунингдек, у картошка фри ва музқаймоқни яхши кўради.
Кейин Баффет ҳазил билан журналистга “олти ёшли бола каби” овқатланаётганини, чунки уларда ўлим даражаси пастлигини қўшимча қилган.
Билл Гейтснинг айтишича, Баффет асосан МcDonald’s гамбургерлари ва Oreo печенеларини хуш кўриб ейди.
Мавзуга доир:
Изоҳ (0)