Маск, Цукерберг ва Билл Гейтс: дунёнинг энг бой одамлари 2022 йилда қарийб 2 трлн доллар йўқотди

2022 йилда дунёнинг энг бадавлат миллиардерлари 1,9 триллион доллар йўқотган. Бу ҳақда Forbes хабар бермоқда.

9 декабрь ҳолатига кўра, дунё миллиардерларининг умумий бойлиги 13,8 триллион доллардан 11,9 триллион долларга тушган. Forbes маълумотларига кўра, жорий йилда миллиардерлар сони ҳам 2 671 тадан 2 523 тага камайган. 

2022 йил давомида FTX криптобиржаси асосчиси Сем Банкмен-Фрид ва рэппер Канье Уэст каби бир қанча машҳур шахслар эса миллиардерлар сафини тарк этди. 

Жорий йилда умумий ҳисобда 1 триллион доллар йўқотган 300 нафар технологик миллиардерлар энг кўп зарар кўрди. Улар учун пандемиядаги компания ва стартаплар акцияларининг кескин ошишидан кейин вазият беқарор бўлиб бормоқда. 

Бундай вазиятда дунё бўйлаб кўплаб компаниялар ишчиларни бўшатиш орқали харажатларни қисқартирмоқда. 

Amazon акциялари йил давомида деярли 50 фоизга тушиб кетди. Google’нинг бош компанияси Alphabet акциялари 36 фоизга тушгани оқибатида компания асосчилари Ларри Пейж ва Сергей Брин 40 миллиард доллар йўқотди. 

Технологик гигант — Microsoft акциялари ҳам декабрь ҳолатига кўра 27 фоизга арзонлашган, бу унинг асошиси Билл Гейтс ва собиқ бош директор Стив Балмернинг соф бойлигини пасайтирди. 

Facebook ва Instagram бош компанияси — Мeta’га эгалик қилувчи Марк Цукерберг эса жорий йилда тахминан 78 миллиард доллар йўқотди. Бунга Мeta акциялари 66 фоизга арзонлашгани сабаб бўлди. 

2022 йилда энг кўп бойлик йўқотган инсон эса Илон Маск бўлди. Маск бойлигининг асосий қисми электромобиль ишлаб чиқарувчи Tesla компанияси ҳиссасига тўғри келади. Компания акциялари эса йил бошидан бер 60 фоизга пасайди ва бу 2022 йилда Маскнинг 115 миллиард доллар йўқотишига олиб келди. 

Жорий йил авваллида Илон Маск дунёнинг энг бой одамлари рейтингида Бернард Арнони 70 миллиард долларга ортда қолдираётган эди. Декабрь бошида Tesla компанияси асосчиси Арнога биринчи ўринни бой берди. Маскнинг бойлиги пасайишда давом этмоқда.  

2022 йил давомида америкалик миллиардерлар энг кўп зарар кўрди — 660 миллиард доллар. Хитойлик миллиардерлар 620 миллиард доллар йўқотган бўлса, санкциялар оқибатида россиялик миллиардерларнинг умумий бойлиги ҳам 150 миллиард долларга камайган. 

Бироқ 2022 йил ҳамма учун ҳам ёмон бўлмади. Инвестиция ва спорт магнати Тодд Боэли ва моделер Том Форд бу йил миллиардерлар қаторига қўшилди. 

Ҳиндистонлик миллиардер Гаутам Адани эса 2022 йилда қўшимча 55,1 миллиард доллар ишлаб топди. У электр энергияси, яшил энергия ва кўчмас мулк конгломерати Adani Group’га эгалик қилади. 

Мавзуга доир: Илон Маск жорий йилда 2021 йилда топган бойлигидан кўра кўпроқ маблағ йўқотди — Bloomberg