Хитойлик миллиардер Жастин Сан деворга скотч билан ёпиштирилган 6,2 миллион долларлик бананни еди. У италиялик рассом Маурисио Каттеланнинг ушбу санъат асарини аукционда харид қилганди. Бу ҳақда AFP хабар берди.
Миллиардер TRON блокчейн платформасининг асосчиси бўлиб, ўтган ҳафта кимошди савдосида “Комедиан” номли санъат объектини сотиб олганди. У ўшанда бананни шунчаки санъат асари эмас, балки “маданий ҳодиса” деб атаб, ейишга ваъда берганди.
Гонконгдаги энг қиммат меҳмонхоналардан бирида бўлиб ўтган 29 ноябрь кунги конференцияда Сан берган ваъдасини бажарди. У деворга скотч билан ёпиштирилган бананни еди. Жастин Сан санъат асари бошқа бананлардан мазалироқ эканини таъкидлади.
“Комедиан” асари биринчи марта 2019 йилда Майами Бичдаги Art Basel кўргазмасида намойиш этилган, ўшанда томошабинлар орасида бу ҳақиқий санъатми ёки шунчаки ҳазилми, деган баҳслар келиб чиққан.
Изоҳ (0)