Осиёнинг энг бой банкири долларни “дунёдаги энг йирик молиявий террорчи” деб атади

Осиёнинг энг бой банкири, Ҳиндистоннинг йирик банкларидан бири Kotak Mahindra Bank бош директори Удай Котак АҚШ долларини кескин танқид қилди. Бу ҳақда The Economic Times хабар берди.

Котакнинг фикрича, АҚШ долларининг захира валютаси мақоми унга глобал операцияларни назорат қилиш имкониятини беради, бу эса бошқа давлатлар унга қарам бўлиб қолиши мумкин бўлган вазиятларга олиб келади.

“Бизнинг барча пулларимиз ностро (бу чет элдаги банк томонидан миллий валютада юритиладиган ҳисоб) ҳисобларида ва АҚШда кимдир уни ечиб ололмайсиз, деб айтиши мумкин. Шу пайтда сиз ‘тупикда’ бўласиз”, — деган у.

Котакнинг сўзларига кўра, ҳозир бутун дунё “муқобил захира валютасини астойдил изламоқда”. Банкир Ҳиндистон учун рупийни шундай валютага айлантириш вақти келганини айтди.

“Менимча, Европа ўзининг захира валютасини ишлаб чиқара олмайди. Буюк Британия ёки Япония бу позицияни эгаллашга журъат эта олмайди, гарчи Британия фунти ҳам, иена ҳам эркин валюта ҳисобланади. Менимча, Хитой кўплаб мамлакатлар билан ишонч борасида жиддий муаммога эга”, — деди у.

Банкир Ҳиндистонга тўхталиб, жаҳон захира валютасини яратиш учун унинг мамлакати узоқ йўл босиб, кучли институтлар яратиши кераклигини таъкидлади.

“Ҳиндистон ҳеч кимнинг инжиқлигига боғлиқ бўлмаган тузилма яратиши керак. Механизмлар ишончли бўлиши керак. Уриниб кўриш вақтимиз келди, бунга 10 йил кетса керак”, — деган Маҳиндра.