Лондон Олий суди Роман Абрамовичнинг бизнес шериги, миллиардер Евгений Швидлерга нисбатан Россиянинг Украинага ҳужумидан кейин қўйилган санкцияларни бекор қилишдан бош тортди. Бу ҳақда Reuters хабар берди.
Британия Швидлерни Абрамович ҳамда Россиянинг “Сибнефть” ва “Евраз” компаниялари билан алоқалари туфайли 2022 йилнинг март ойида санкциялар рўйхатига киритганди. Шундан сўнг тадбиркорнинг иккита шахсий самолёти ҳибсга олинган. Швидлер Британия расмийлари хатога йўл қўйганини айтиб, қарор устидан судга шикоят қилган.
Тадбиркорнинг адвокатлари судда Швидлернинг Россия президенти Владимир Путин ва Кремль сиёсатига алоқаси йўқлигини ва 2007 йилда собиқ президент Борис Елсиннинг дафн маросимидан бери Россияда бўлмаганини айтган.
Адвокатларнинг фикрича, санкциялар тадбиркорни активларини бошқариш ва бизнес юритиш имкониятидан маҳрум қилган, шунингдек, унинг обрўсига путур етказган.
Миллиардер ҳимоячиларидан бири Майкл O’Кейн тадбиркор “яқин фурсатда” Олий суд қарори устидан шикоят қилишини айтди.
“У ҳеч қачон Россия фуқароси бўлмаган, 15 йилдан ортиқ вақт давомида Россияга бормаган ва Россия ҳукуматининг Украинадаги ҳаракатларини танқид қилган. Британия ҳукуматининг бундай сиёсати ёки тавсияси йўқлигини ҳисобга олсак, Швидлер санскиялари рўйхатидан чиқиши учун яна нима қилиши мумкинлигини билмайди”, — деди адвокат.
Россиянинг Украинага босқинидан сўнг, кўплаб россиялик ишбилармонлар ва сиёсатчилар Европа Иттифоқи, АҚШ, Буюк Британия, Япония, Канада, Австралия ва бошқа мамлакатларнинг санкциялари остида қолди.
Евгений Швидлердан ташқари, миллиардерлар Роман Абрамович, Алишер Усмонов, Пётр Авен ва Михаил Фридман ҳам судларда бу қарорга қарши чиқишга уринмоқда.
Изоҳ (0)