Алишер Усмоновнинг бойлиги 124 млн долларга камайди

Bloomberg Billionaires Index маълумотларига кўра, россиялик миллиардерларнинг умумий бойлиги январь ойида 8 миллиард долларга ошди.

Тегишли индекс дунёнинг энг бадавлат 500 кишисидан иборат бўлиб, уларнинг бойлиги ўз улушига эга бўлган компанияларнинг акциялари нархидан келиб чиқиб ҳисобланади. Индексда кўрсатилган россиялик барча 26 нафар тадбиркорнинг умумий бойлиги 1 февраль ҳолатига кўра 507,14 миллиард долларни ташкил этади.

Россиялик миллиардерлар орасида “Северстал” эгаси Алексей Мордашовнинг капитали энг юқори кўрсаткични қайд этди. Жумладан, унинг бойлиги 2,14 миллиард долларга ошди. Россиянинг энг бой тадбиркори, индексга кўра, “Интеррос” холдинги ва “Норилск Никeль” президенти Владимир Потанин ҳисобланади, унинг бойлиги 31,7 миллиард долларга баҳоланмоқда, иккинчи ўринда “Новатек” раҳбари Леонид Михелсон (27,4 миллиард доллар), учинчи ўринда — “Лукойл” таъсисчиларидан бири Вагит Алекперовдир (25,5 миллиард доллар).

Ўз навбатида, россиялик миллиардер Алишер Усмоновнинг бойлиги 124 миллион долларга камайиб, 21,1 миллиард долларни ташкил қилмоқда.