Kipr hukumati respublikaning investitsiya dasturi doirasida “oltin pasport” olgan 77 nafar chet ellikni fuqarolikdan mahrum qildi. Ular qatorida rossiyalik milliarderlar ham bor. Bu haqda Politis xabar berdi.
“Rusal” asoschisi Oleg Deripaska, “Alfa-Grupp” aksiyadori Aleksey Kuzmichev, “Safmar” guruhi asoschisi Mixail Gutseriyev, shuningdek, “Probiznesbank” sobiq egasi Aleksandr Jeleznyak Kipr fuqaroligidan mahrum etildi. Ro‘yxatga birdaniga 2024-yilda Forbes milliarderlari reytingidan joy olgan yetti nafar rossiyalik milliarder kirdi.
Ro‘yxatga rossiyalik tadbirkorlardan tashqari bir nechta ukrainalik ham kiritilgan. Misol uchun, firibgarlik va pul yuvish bo‘yicha Kiyev hibsxonasida saqlanayotgan milliarder Igor Kolomoyskiy, shuningdek, “UkrLandFarming” egasi Oleg Baxmatyuk.
“Oltin pasport”lar uchta sababga ko‘ra bekor qilinadi
Xorijliklar ro‘yxati taxminan bir oy oldin tayyorlangan. “Oltin pasport”dan nafaqat investorlarning o‘zlari, balki ularning oila a’zolari ham mahrum bo‘ladi. Kipr fuqaroligidan mahrum qilish uch sabab bilan asoslanishi mumkin: ariza berishda yolg‘on yoki chalg‘ituvchi ma’lumotlar, ariza beruvchining jinoiy o‘tmishi va naturallashtirish shartlariga rioya qilmaslik.
Pasportidan mahrum bo‘lgan chet elliklar Kipr hukumatining qarori ustidan shikoyat qilishi mumkin. Kipr ko‘p sonli suiiste’molliklar fonida 2020-yilda “oltin pasportlar” berish dasturini to‘xtatdi. Al Jazeera jurnalistlari tomonidan o‘tkazilgan tergov natijasida hatto mahkum chet elliklar va qidiruvdagilar ham fuqarolikni olishi mumkinligi aniqlandi.
Izoh (0)