Россиялик миллиардерлар Михаил Фридман ва Пётр Авен Alfa Bank’даги акцияларини бизнес шериги Андрей Косоговга 2,3 миллиард долларга (178 миллиард рубль) сотишга тайёр. Улар шу тариқа Ғарб санкцияларини олиб ташлашга эришмоқчи. Бу ҳақда Financial Times (FT) келишув шартлари билан таниш бўлган тўрт нафар суҳбатдошига таяниб хабар берди.
FT маълумотларига кўра, Ғарб санкциялари остида қолмаган Андрей Косогов аллақачон кредит муассасаси акцияларини олишга рози бўлган. 2022 йил март ойидан бери тадбиркор ABH Holdings орқали Alfa Bank’нинг 40,96 фоиз улушига эгалик қилади — у ташкилотнинг энг йирик бенефициари ҳисобланади. Петр Авен 12,4 фоиз, Михаил Фридман 32,9 фоиз улушга эгалик қилади.
Келишув шу йилнинг баҳорида ёпилиши мумкин. Уни амалга ошириш учун тартибга солувчи органлар, Россия банки, шунингдек, АҚШ ва Европа Иттифоқи (ЕИ) санкцияларини тартибга солувчи органларнинг розилиги талаб қилинади.
Нашрнинг ёзишича, Россия ва Украина ўртасида уруш бошланишидан аввал банкнинг қиймати 10,6 миллиард долларга баҳоланган. Форбес Петр Авеннинг бойлигини 4,2 миллиард долларга, Михаил Фридманнинг бойлигини эса 12,4 миллиард долларга баҳолаган.
Дастлаб уларга 2022 йил 28 февральда Европа Иттифоқи, 15 мартда эса Буюк Британия санкциялар киритган.
Март ойида бизнес вакиллари Alfa Bank директорлар кенгашини тарк этганди. Кейинроқ улар Люксембургдаги Европа судига санкцияларни бекор қилишни талаб қилиб, ЕИ Кенгашига қарши даъво аризалари билан мурожаат қилган.
Изоҳ (0)