IT Park USAID агентлиги билан биргаликда Қорақалпоғистон қишлоқ аёл-қизлари учун АКТ бўйича кенг қамровли «IT Women — Karakalpakstan» дастурини ишга туширди.
Дастур пилот тарзида ишга туширилган. Унда аёлларга АКТнинг асосий кўникмалари бўйича билимлар бериш назарда тутилган бўлиб, бу уларга келажакда иш ёки тадбиркорлик билан шуғулланиш имконини беради. Иштирокчиларга таълимдан ташқари менторлик кўмаги ҳам берилади.
Лойиҳа доирасида 60 нафар хотин-қизлар IT Park кўмагида Нукус шаҳридаги IT-академия томонидан ташкил этилган бепул ўқув курсларида иштирок этади.
Уларнинг 30 нафари график дизайн курслари, 30 нафари SMM йўналишига таҳсил олади.
Ушбу ташаббус USAID’нинг иқлим ўзгаришидан жабр кўрган аёлларга касбий билимларни эгаллашда кўмаклашиш, микрокредитга эга бўлишда ёрдам бериш, шунингдек, амалиёт ўташ, ишга жойлашиш ва маслаҳат бериш орқали уларнинг имкониятларини кенгайтиришга қаратилган кенг қамровли дастурининг бир қисмидир.
USAID’нинг Ўзбекистондаги миссияси директори Микаэла Мередит таъкидлашича, аёллар рақамли ва тадбиркорлик кўникмаларини ривожлантириш орқали электрон тижорат билан шуғулланишлари мумкин.
Бундан ташқари улар глобал ва маҳаллий платформалар орқали товарларни сотишлари, ўз бизнесларини илгари суриш учун ижтимоий тармоқлардан фойдаланишлари ҳамда бошқа имкониятларга эга бўлади.
Хотин-қизларнинг иқтисодий имкониятларини кенгайтириш гендер тенглигига эришиш, турмуш даражасини ошириш ҳамда инклюзив ва барқарор иқтисодий ўсишга эришишнинг калитидир.
Изоҳ (0)