Шимолий Корея ҳарбийлари 1 июль куни Япон денгизи томон иккита йирик баллистик ракета учирган. Бу ҳақда Жанубий Кореянинг Yonhap агентлиги хабар тарқатган.
Баллистик ракеталар душанба куни тонгги 5:05 ва 5:15 да Жанубий Ҳванҳе провинциясининг Жангён ҳудудидан учирилган. Ракеталар шимоли-шарқий йўналиш бўйлаб Япон денгизи томон ҳаракатланган.
Баллистик ракеталар Жанубий Корея армияси АҚШ ва Япония билан ҳамкорликда ўтказган қўшма ҳарбий машғулотларга қарши жавоб чораси тарзида учирилгани тахмин қилинган. Ракеталар тури ва ҳалокат олиб келиш даражаси ҳақида маълумот йўқ, чунки Пхеньян бу каби қуролни олдин синовдан ўтказмаган.
Ракеталар қанча масофага учиб боргани номаълум. Жанубий Корея ҳарбийлари улар денгизга қулаб тушган бўлиши мумкинлиги ҳақида хабар тарқатган.
Якшанба куни Шимолий Корея Ташқи ишлар вазирлиги уч кунлик давом этган АҚШ, Япония ва Жанубий Корея иштирокидаги ҳарбий машқларни кескин қоралаган. “Озодлик қалқони” операцияси ҳеч қандай машғулот эмас, балки таҳдид ва хатар эканини таъкидлаган.
Маълумот ўрнида, Россия президентининг Пхеньянга ташрифи ва ҳарбий пакт имзоланиши ортидан яриморолда кескинлик ниҳоятда кучайди. Аввалига Шимолий Корея бир неча ядро каллагини кўтариб уча оладиган ракетасини намойиш этди ва синовини ўтказди. Кейинроқ эса бу ҳаракатга жавобан АҚШ авиаташувчилари ва ҳарбий кемалари Япон денгизига кирган.
Изоҳ (0)