Шимолий Корея 1 июль куни ўта йирик ядровий каллакни олиб уча оладиган баллистик ракетани синовдан ўтказган. Бу ҳақда мамлакатнинг KCNA давлат ахборот агентлиги тарқатган маълумотга асосланиб, Reuters хабар берди.
Янги баллистик ракета 4,5 тонналик ўта йирик жанговар каллакни олиб учишга қодирлиги айтилган. Шимол расмийлари тактик ядровий ракета синовлари муваффақиятли ўтганини хабар қилган.
Олдинроқ ҳам Шимолий Корея ҳарбийлари иккита баллистик ракета синовини амалга оширган эди. Ракеталар Япон денгизи томон учирилган. Жанубий Кореянинг Yonhap агентлиги баллистик ракеталардан бири манзилга етмай қулаб тушганини ёзган.
Ўта оғир каллакли баллистик ракетага Пхеньян расмийлари Хвасонгфо-11 Да-4.5 деб ном беришган. Янги тактик баллистик ракетанинг синови парвоз барқарорлиги ва аниқлигини текшириш учун симуляция қилинган оғир каллак ёрдамида амалга оширилган.
Шимол расмийлари янги ракета анъанавий Хвасонг-11 ракетаси асосида яратилганини маълум қилган. Ушбу турдаги ракеталари ядро каллаги ўрнатилган ҳолатда 600 километргача масофага уча улади ҳамда нишонни айланма тарзда ура олади.
Жанубий Корея расмийлари сўнгги ракетага KN-23 деб ном берган. Расмийлар айни дамда Пхеньян ушбу турдаги ракета синови ўтказганига далиллар қидирилаётгани ҳақида маълум қилган.
Ким Чен Ин назоратидаги ҳарбий маъмуриятга кўра, июль ойи охирида оғир каллакли Хвасонгфо-11 ракетасининг навбатдаги синови амалга оширилади. Синов ҳудуди ва йўналиши маълум қилинмаган.
Изоҳ (0)