Сербия президенти Александр Вучич Россия президенти Владимир Путиннинг Россия Федерациясини ҳимоя қилиш учун барча турдаги қуроллардан фойдаланиш ниятига шубҳа билан қарамасликка чақирди.
У барча томонлар сулҳ ҳақида гапиришдан бош тортгани сабабли вазият фалокат томон кетаётганидан огоҳлантирди.
“Агар сиз Россиядаги исталган нишонга зарба бериш жавобсиз қолади, Путин ўзи зарур деб билган барча турдаги қуроллардан фойдаланмайди, деб ўйлаётган бўлсангиз, сиз ё Путинни яхши танимайсиз ёки ақлдан озгансиз”, деди Вучич. "Путин ядровий зарба бўйича ҳазиллашмаяпти, биз, афсуски, аста-секин фалокатга яқинлашмоқдамиз", дея қўшимча қилди у.
Жорий ҳафтада АҚШ президенти Жо Байден Украинага Россия ҳудудидаги нишонларга зарба бериш учун узоқ масофали ATACMS ракеталаридан фойдаланишга рухсат бергани маълум бўлди.
Кейинчалик оммавий ахборот воситаларида Британиянинг Storm Shadows ракеталари билан ҳам ҳужум қилишга рухсат берилгани, уларнинг масофаси модификацияга қараб 560 км га етиши мумкинлиги ҳақида хабар берилди.
Россия Мудофаа вазирлиги сўнгги кунларда ATACMS ва Storm Shadow ракеталарининг ҳужумлари қайтарилганини маълум қилган.
19 ноябрь куни Владимир Путин янгиланган ядровий доктринани тасдиқлади. Янги доктринага кўра, Россияга қарши Ғарбнинг ядровий бўлмаган ракеталари қўлланса, Россия бунга жавобан ядровий зарба бериши мумкин.
Шунингдек, доктринада ядровий давлат кўмагида ядровий бўлмаган давлатнинг ҳужуми қўшма ҳужум сифатида баҳоланиши белгиланган.
Изоҳ (0)