НАТО кучларининг Украинада пайдо бўлиши бутун дунё учун ҳалокатли оқибатларга олиб келади ва альянснинг Россияга қарши урушга киришишини англатади.
Бу ҳақда Россия ТИВ расмий вакили Мария Захарова брифингда маълум қилди.
“Эҳтимол, улар НАТО контингентларининг Украина ҳудудида пайдо бўлиши альянснинг мамлакатимизга қарши урушга киришишини англатишини тушунмаётгандир? Биз бу ҳақда уларга бир неча бор айтганмиз, чунки бу нафақат Европа учун, балки бутун дунё учун ҳалокатли оқибатларга олиб келади”, деди Захарова.
Аввалроқ Эстония ташқи ишлар вазири Маргус Сахк Украинага Европа давлатларининг ҳарбий кучларини юбориш зарурлиги ҳақида айтиб ўтганди.
АҚШ президенти Жо Байден Украинага Россия ҳудудига зарба бериш учун узоқ масофали қуроллардан фойдаланишга рухсат берганидан кейин Киев ва Москва ўртасидаги вазият янада кескинлашди.
19 ноябрь куни украиналик ҳарбийлар Американинг ATACMS ракеталари ёрдамида Брянск вилоятидаги ҳарбий объектни ўққа тутгани ҳақида хабар берилган эди.
Бунга жавобан Россия 21 ноябрь куни Днепр бўйлаб қитъалараро баллистик ракета учирди.
Ҳужум Астрахан вилоятидаги полигондан амалга оширилгани айтилмоқда. Ушбу маълумотнинг мустақил тасдиғи мавжуд эмас. Қитъалараро баллистик ракета беш минг километр масофани босиб ўтиши мумкин, аммо уларнинг баъзилари тўққиз минг километрдан ортиқ масофага мўлжалланган.
Шунингдек, брифинг чоғида Мария Захаровага жонли эфирда қўнғироқ бўлгани ва номаълум эркак телефон орқали Захаровага баллистик ракета зарбалари ҳақида баёнот бермасликни айтгани акс этган видеолар ижтимоий тармоқларда тарқалди.
Изоҳ (0)