Қозоғистоннинг Қарағанда вилоятидаги Костенко конида содир бўлган портлаш қурбонлари сони 36 кишига етди. Бу ҳақда Қозоғистон Фавқулодда вазиятлар вазирлиги матбуот хизмати хабар берди.
Маълум қилинишича, айни пайтда 36 кишининг жасади топилган. Яна 10 нафар кончини қидириш ишлари давом этмоқда.
Қарағандадаги Костенко конида портлаш 28 октябрь куни содир бўлганди. Қозоғистон президенти Қосим-Жўмарт Тўқаев фожиа содир бўлган жойга бориб, авария ҳолатларига ойдинлик киритиш ва тегишли чораларни кўришни буюрди.
Дастлабки версияга кўра, лавада ёнғин содир бўлган. Портлашнинг кучи шундай бўлганки, ғарбий ва шарқий блоклардаги телекоммуникация тизими ишдан чиққан. Зарба тўлқини нафақат фавқулодда вазият ҳудудига, балки шарқий блокда жойлашган К2 лавасига ҳам таъсир кўрсатган. Зарба тўлқинининг тарқалиш диапазони 2 километрдан ошган.
Республикада 29 октябрь умумхалқ мотам куни деб эълон қилинди.
Кўмир конида юз берган фожиа муносабати билан Ўзбекистон, Россия, Беларусь, Қирғизистон, Франция президентлари, шунингдек Туркия ТИВ Қозоғистон халқига ҳамдардлик билдирди.
Изоҳ (0)