Қирғизистонда Миллий хавфсизлик давлат қўмитаси (МХДҚ) раҳбари Қамчибек Ташиевга суиқасд уюштиришни режалаштирган Руслан Бостеринский лақабли уюшган жиноий гуруҳ фаоли қўлга олинди. Бу ҳақда 24.kg хабар берди.
Махсус хизматларга кўра, 41 ёшли Руслан Бостеринский Қирғизистоннинг энг машҳур “қонундаги ўғриси” Қамчи Колбаевнинг яқин шерикларидан бири бўлган. У Иссиқкўл туманидаги Бўстери қишлоғини назорат қилган. Бостеринский илгари босқинчилик ва қотиллик учун судланган.
У қидирувда бўлган вақтида Қирғизистон Миллий хавфсизлик давлат қўмитаси раҳбарига суиқасд уюштиришни режалаштирган. Қўлга олинган шахс тергов изоляторига жойлаштирилган. У уюшган жиноий гуруҳ тузиш ва унда иштирок этишда айбланмоқда.
Қамчи Колбаевнинг қўлга олиниши
2022 йилда МХДҚ ходимлари томонидан машҳур криминал авторитет Қамчи Колбаев ва унинг яқинлари бўлган ўн кишини қўлга олинганди. Улар Қирғизистон-Хитой чегараси яқинида (Жети-Ўғуз тумани) жойлашган “Булат-М” ов ўрмонзоридан қайтиб келаётганида “Қорасой” чегара пунктида ушланган.
Текширув чоғида улар чегара ҳудудига Қирғизистон давлат органларининг тегишли рухсатномаларисиз келгани аниқланган. Уларнинг ёнларида саккизта ўточар қурол ҳам бўлган. 2011 йил июнида Колбаев АҚШда расман халқаро наркобизнеснинг бош иштирокчиларидан бири деб тан олинган ва машҳур “Биродарлар доираси” рўйхатига киритилган. АҚШ у ҳақидаги маълумот учун 5 миллион доллар мукофот ваъда қилганди.
Изоҳ (0)