Ўзбекистон ва Қирғизистон ўртасидаги ўзаро товар айирбошлаш ҳажми 2 миллиард долларга етиши кутилмоқда, деб хабар бермоқда Дунё агентлиги.
Ўзбекистоннинг Бишкекдаги элчихонаси Қирғизистон Ташқи ишлар вазирлиги дипломатик академияси билан ҳамкорликда мамлакатлар ўртасида дипломатик муносабатлар ўрнатилганининг 30 йиллигига бағишланган давра суҳбати ташкил этди. Тадбирда ўзбекистонлик дипломатлар, Қирғизистон Ташқи ишлар вазирлиги, Дипломатик академия вакиллари, илмий зиёлилар, қирғизистонлик сиёсатшунос ва экспертлар иштирок этди.
Қайд этилишича, Бишкек ўзаро товар айирбошлаш ҳажмини 2 миллиард долларга етказишни мақсад қилган. Қирғизистон тоғ-кон ва кўмир саноати, саноат кооперацияси, қишлоқ хўжалигини қайта ишлаш, энергетика, қурилиш ва бошқа соҳаларда йирик қўшма инвестиция лойиҳаларини ишга тушириш бўйича белгиланган вазифаларни амалга оширишни муҳим деб ҳисоблайди. Қирғизистонда автомобиль ва тижорат техникаларини ишлаб чиқаришни ташкил этиш лойиҳаси алоҳида қайд этилди.
Таъкидланишича, Бишкек Ўзбекистон—Қирғизистон тараққиёт жамғармаси ишбилармонлик алоқаларини кенгайтириш ва савдо ҳажмини ошириш учун самарали платформага айланишига умид қилмоқда. Тез орада икки давлат пойтахтларида очиладиган савдо уйлари фаолияти самарадорлигига умид билдирилди.
Ўзбекистонлик дипломатлар иштирокчиларга Хитой—Қирғизистон—Ўзбекистон темирйўли қурилиши лойиҳасини амалга ошириш бўйича томонларнинг фаол фаолияти ҳақида маълумот берди. Маданий-гуманитар соҳадаги икки томонлама ҳамкорлик ҳам янги суръат касб этгани қайд этилди.
Изоҳ (0)