Қирғизистон президенти Сўранбай Жеенбеков Ўзбекистонга расмий ташриф билан келган 13 декабрь куни Тошкентда ўзбек-қирғиз бизнес-форуми ва кооперация биржаси бўлиб ўтди, дея хабар бермоқда «Газета.uz».
Бизнес-форумда Қирғизистоннинг машинасозлик, қурилиш, озиқ-овқат, қадоқлаш, енгил саноат ва ахборот технологиялари соҳаларида фаолият кўрсатувчи 100 дан зиёд компанияси иштирок этди.
Ўзбекистон ташқи савдо вазири Жамшид Хўжаев форум иштирокчиларини қарши олар экан, йил бошидан буён икки давлат ўртасидаги товар айрибошлаш ҳажми 60 фоиздан зиёдроққа ўсиб, 200 миллион долларни ташкил этганини таъкидлади.
«Қатъий шартномалар мавжудлигини ҳисобга олсак, уни 2017 йил охирига қадар 250 миллион долларга етказиш учун барча имкониятлар бор», — деди ташқи савдо маҳкамаси раҳбари.
У Ўзбекистон корхоналари Қирғизистонга енгил ва юк машиналари, автобуслар, қишлоқ хўжалиги ва йўл техникасининг кенг ассортименти, барча турдаги минерал ўғитлар, электротехника ва кабел-ўтказиш маҳсулотлари, маиший техника, қурилиш материаллари, тайёр тўқимачилик, озиқ-овқат ва бошқа маҳсулотларни етказиб бериши мумкинлигини қайд этиб ўтди.
Жамшид Хўжаев октябрдаги олий даражадаги учрашувлар чоғида эришилган келишувларга мувофиқ, Қирғизистон ҳудудида ўзбек қишлоқ хўжалик техникалари, «Ўзавтосаноат» автомобиллари, «SamAvto» автобуслари, «Ўзавтотрейлер» махсус прицепли техникалари, Artel бренди остида кир ювиш машиналарини йиғишни ташкил этиш бўйича ҳамкорликдаги ишлар олиб борилаётганини маълум қилди. Шунингдек, ҳамкорликда тўқимачилик ва қурилиш материалларини ишлаб чиқариш бўйича қўшма корхоналар ташкил этиш режалаштирилган.
Қирғизистон иқтисодиёт вазири Артём Новиков ички салоҳиятдан фойдаланиб, бир-бирини ўзаро тўлдирган мамлакатлар нафақат товар айирбошлаш ҳажмини 500 миллион долларга етказиши, балки экспорт имкониятларини ҳам кенгайтиришлари мумкинлигини қайд этиб ўтди. Қирғиз тадбиркорлари Ўзбекистон бозорига озиқ-овқат маҳсулотлари, жумладан, асал, картошка, пиёз, сут ва гўшт маҳсулотларини етказиб бериши, Ўзбекистон билан ҳамкорликда кўмир саноати корхонасини ташкил этиш ва мамлакатни травертин тоши билан таъминлаши мумкин.
Қирғизистон иқтисодиёт вазири икки давлат банклари ўртасида мухбирлик ҳисоб-рақамларини очиш бўйича дастлабки келишувга эришилгани ва Ўзбекистон томонидан банк ва молия операциялари, жумладан, икки давлат ўртасида пул ўтказишларини амалга оширишда ҳеч қандай тўсқинлик ва чекловлар бўлмаслигини маълум қилди. Айниқса бу маҳсулотлар етказиб бериш ва сотиш орқали қирғиз тадбиркорлари оладиган фойдани олишга алоқадор.
У сайёҳлик алоқаларини кучайтириш учун янги транспорт йўналишларини ривожлантириш, жумладан, режалаштирилаётган «Ўш—Тошкент» авиарейси ва Қирғизистоннинг Иссиқкўл вилоятидаги Балиқчи шаҳрига қадар темирйўл рейсини очишнинг зарурлигини ёдга олди.
Бизнес-форум якунлари бўйича 140 миллион долларлик 60 га яқин ҳужжат имзоланди.
Изоҳ (0)