Қозоғистон ҳукумати мамлакатдан автомобиль орқали кўмир олиб чиқишни олти ойга тақиқлаши мумкин. Бу ҳақда Қозоғистон Саноат ва инфратузилмани ривожлантириш вазирлигининг буйруғига таяниб, Forbes хабар бермоқда.
Тошкўмирдан олинадиган кўмир, брикет, гранула ва шунга ўхшаш турдаги қаттиқ ёқилғиларни Қозоғистон ҳудудидан олти ой муддатга автомобиль орқали олиб чиқиш тақиқлансин, — дейилади жамоатчилик муҳокамаси учун эълон қилинган буйруқ лойиҳасида.
Маълумотларга кўра, 2021 йил сентябрь ойидаги кескин совуқ муносабати билан мамлакатнинг марказий ва шимолий ҳудудларида кўмирга талаб кескин ошган.
Бундан кўмир харид қилишнинг энг қизғин даврида уни икки баравар қимматга сотган виждонсиз олиб-сотарлар фойдаланган, — дейилади хабарда.
Шу билан бирга, бу даврда автомобиль транспортида ички бозор учун мўлжалланган кўмирнинг қўшни давлатлар – Қирғизистон ва Ўзбекистонга экспорти ҳам ошган.
Аввалроқ 2022 йилда жаҳоннинг кўмирга бўлган талаби 8 млрд тоннага етиши ҳақида хабар берилганди.
Изоҳ (0)