Жаҳон миқёсида машҳурликка эришган юлдузлар экран ортидаги ҳақиқий ҳаёти қандай эканлиги барчага қизиқ. Баъзан саҳнада биз кўришга муваффақ бўлган воқеалардан ҳам кўпроғини билиш имконияти туғилади. Бугун биз Бейонсе ҳаёти ҳақида сўзлашамиз.
Хонанда куни кеча GQ журналига катта интервью берди. Суҳбат давомида у ўз ҳаёти ҳақида батафсил сўзлаб берди. Бейонсе ўзининг Cоwboy Cаrter номли баҳорги альбоми ҳақидаги таассуротлари ҳамда шахсий ҳаёти ҳақида қизиқарли маълумотлар билан бўлишди:
“Мен шу кунга қадар бажарган ишларимдан фахрланаман, аммо шу билан бирга мен ва оилам қандай қурбонликларни бошидан ўтказганини англайман ва тан оламан. Биласизми, мен учун ҳаётдаги энг катта мукофот бу қалбимдаги қувонч ҳиссидир. Агар мен ёзган мусиқалар инсонларни эркин фикрлашга ва имконсиз нарсага йўқлигига ишонтирса, бу мен учун улкан совғадир”.
Шунингдек, Бейонсе тиғиз кун тартиби ва доимий банд иш жадвалига қарамай кўп фарзандли она ролини ҳам яхши бажараётган юлдузлардандир. Ахир, тугамас саёҳатлар ва гастрол сафарларида бўладиган хонанда учун яхши она мақомини сақлаб қолиш осон эмас. Бейонсе карьераси, тадбиркорлик ишлари ва машҳурлигига қарамай, унинг оиласи ва фарзандлари хонанда ҳаётидаги энг устувор вазифадир:
“Иш жадвалимни тузишда мен оиладаги режаларга эътибор қаратаман. Болаларим мактабда бўлмагандагина гастролларга боришга ҳаракат қиламан, чунки ҳар доим оилам билан биргаликда дунёни кезишни, фарзандларимни турли тиллар, архитектура ва турмуш тарзи билан таништиришни орзу қилганман.
Уч фарзандни тарбиялаш осон эмас. Ёши улғайгани сари болаларнинг ўзига хос эҳтиёжлари, севимли машғулотлари пайдо бўлади, ижтимоий ҳаётга кириб келади ва шу тариқа мустақил шахсларга айлана бошлайди. Буларнинг барига аҳамият бериш лозим. Менинг эгизакларим эса Парвардигор менга берган энг буюк туҳфадир”, — дейди хонанда.
Мухлисларда савол туғилади: Бейонсе қандай қилиб барча ишларга улгуради ва намунали она мақомини сақлаб қолади? Юлдузнинг сўзларига кўра, ҳамма гап мусиқада. Қийин дамларда мусиқа Бейонсега куч ва мотивация берадиган майоққа айланади:
“Қўшиқ куйлаш мени тинчлантиради, юрак уришимни мўтадиллаштиради. Мусиқа мен учун дофаминнинг энг яхши манбаидир. Зеро хонандалик мен учун иш эмас, балки севимли машғулотимдир. Мен мусиқани яратишни, қўшиқ айтишни чин дилдан яхши кўраман. Мураккаб кунларда, қайғуга тушган вақтларимда, касал бўлиб қолганимда ёки уйқусиз тунлар туфайли стрессга тушганимда қўшиқ айтаман. Ва кўпинча ёлғиз қўшиқ айтаман”, — дейди Бейонсе.
Бейонсе жисмонан соғлом бўлишга ҳам доимо ҳаракат қилади. Хонанда ҳар томонлама ўз устида ишлаш лозим деб билади:
“Мен соғлиғимга доимий эътибор беришга ҳаракат қиламан, бунинг учун озуқавий қўшимчалар қабул қиламан ва соғлом овқатланиш тартибига амал қиламан. Масалан, бу йил ёзда мен бутунлай гўшт ейишдан воз кечдим, истисно тариқасида фақат курка гўшти истеъмол қилишим мумкин. Эндиликда жисмонан янада мукаммал бўлиш учун спорт машқларини бошлашим керак. Ҳозирча бунга вақт топа олмаяпман, балки эртага бошларман?”.
Изоҳ (0)