4 декабрь куни суд АҚШ президентининг ўғли Ҳантер Байденга қурол сотиб олаётганда ёлғон маълумот берганлик ва уни ноқонуний сақлаганлик учун ҳукм чиқаради. Бу ҳақда Reuters суд қарорига таяниб хабар берди.
Аввалроқ CNN хабар қилганидек, Ҳантер Байден 25 йилгача қамоқ жазосига ҳукм қилиниши мумкин.
11 июнь куни ҳакамлар ҳайъати уни АҚШ Адлия вазирлиги тақдим этган учта моддада ҳам айбдор деб топди. Икки ҳуқуқбузарлик Байден 2018 йилда Cоlt Cobrа револверини сотиб олаётганда гиёҳванд моддалар истеъмол қилмаётганини айтиб, ёлғон гапиргани туфайли юзага келган. Учинчи ҳуқуқбузарлик гиёҳвандларга ўқотар қуролга эга бўлишни тақиқловчи қонунни бузганликда ифодаланади.
2023 йил декабрь ойи бошида Ҳантер Байден солиқ тўлашдан бўйин товлаганликда ҳам айбланган. Прокурорларнинг фикрича, президентнинг ўғли экстравагант турмуш тарзи учун миллионлаб доллар сарфлаган. Бу ҳолатда унга 17 йилгача қамоқ жазоси берилиши мумкин.
6-июнь куни АҚШ президенти Жо Байден АBC телевидениесига берган интервьюсида Делавер округ судида ўтказилган суд жараёнлари натижасида ўғли Ҳантер айбдор деб топилса, уни афв этмаслигини маълум қилган.
Изоҳ (0)