Аляскада 15 август куни ўтказиладиган АҚШ ва Россия саммити натижасидан қатъи назар, Европа мамлакатлари ҳисобидан Украинага Америка қуролларини етказиб бериш давом эттирилади. Бу ҳақда НАТО бош котиби Марк Рютте Американинг CBS News телеканалига берган интервьюсида айтиб ўтган.

“Мутлақо тўғри, давом эттирилади”, дея у тегишли саволга жавоб берган.
“Шундай қилиб, бизда дастлабки иккита пакет бор, улар бўйича мажбуриятларни аввал Нидерландия, кейин эса Скандинавия мамлакатлари ўз зиммасига олди. Кейинги кунлар ва ҳафталарда яна эълонлар бўлишини кутмоқдаман ва бу жуда муҳим”, дея қўшимча қилган Рютте.
Бош котиб Американинг яна бир телеканали ABC News’га берган интервьюсида эса Украинанинг бир қатор ҳудудлари Россия томонидан амалда назорат қилинаётганини тан олиш кераклигини, аммо буни юридик жиҳатдан мустаҳкамламаслик лозимлигини таъкидлаган.
“Шубҳасиз, бу икки муҳим масала муҳокамага қўйилиши шарт. Улардан бири ҳудудга тегишли ва тан олишимиз керакки, айни пайтда Россия Украина ҳудудининг бир қисмини назорат қилмоқда. Масала ўт очишни тўхтатгандан сўнг қандай ҳаракат қилишда бўлади. Жумладан, бу Украина учун хавфсизлик кафолатлари нуқтайи назаридан нимани англатиши ҳам муҳокама қилинади”, деди у.
14 июль куни АҚШ президенти Дональд Трамп Оқ уйда Рютте билан учрашувда Киевга Европа мамлакатлари ҳисобидан Америка қуролларини етказиб бериш бўйича келишувга эришилганини эълон қилди. Шимолий Атлантика альянсига Патриот тизимларини ҳам ўз ичига олган қуролларни етказиб беришни мувофиқлаштириш вазифаси юклатилди. Трамп НАТО орқали Украинага юбориладиган ҳарбий ёрдам ҳажми миллиардлаб долларни ташкил этишини маълум қилди.
Изоҳ (0)