“МТРК биносидаги ягона лифт икки йилдан бери ишламайди” — сенатор раисга сўров юборди

Сенатор Малика Қодирхонова Миллий телерадиокомпания (МТРК) раиси Абдурашид Журабоевга сенатор сўрови юборди. Бу ҳақда жорий йил 11 август куни Сенат ахборот хизмат хабар берди.

 

Сўровда жисмоний имконияти чекланган шахслар учун инфратузилмавий шароитларни яхшилаш масаласи кўтарилган. Жумладан, МТРКга қарашли Тошкент радиоэшиттириш уйи биносида лифт ишдан чиққани келтирилган.

Беш қаватли бино 1966 йилда қурилган. У ерда “Ўзбекистон”, “Ўзбекистон 24”, “Ёшлар” радиоси, “Маҳалла” телерадиоканали, “Ўзбектелефильм” ДУК, “Мақом” ансамбли фаолият юритади. Бинодаги ягона лифт 1982 йилда ишга туширилган, қурилмадан 41 йил фойдаланилган. Аммо 2023 йилдан бери лифт техник талабларга жавоб бермагани учун ишлашдан тўхтаган.

“Бугунги кунда лифтнинг ишламаслиги натижасида бинода фаолият юритаётган 600 га яқин ходим, икки мингдан зиёд радиоэшиттириш ва кўрсатувларда иштирок этувчилар, шу жумладан, ногиронлиги бўлган шахслар ва кекса ёшдаги ходимлар жиддий қийинчиликларга дуч келмоқда. Бундан ташқари, бинонинг юқори қаватларига чиқиш учун ногиронлиги бўлган шахсларга зарур бўлган қулайликлар – пандуслар, махсус тўсиқлар ва ногиронлар аравачаси учун кўтаргич ускуналар мавжуд эмас. Бу эса меҳнат унумдорлиги ва меҳмонларга кўрсатиладиган хизмат сифатига ҳам салбий таъсир кўрсатмоқда. Шунингдек, Тошкент радиоэшиттириш уйи мутасаддиларининг такрорий мурожаатларига қарамай, лифтни янгилаш ёки муқобил инфратузилмани жорий этиш юзасидан амалиётда тегишли чоралар кўрилмаган”, дейилган сўров мазмунида.

Сенатор сўровида мазкур муаммони бартараф этиш мақсадида лифт тизимини замонавий талаблар ва хавфсизлик меъёрларига мос ҳолда янгилаш, имконияти чекланган шахслар учун қулай шароитлар яратиш борасида амалга оширилаётган ишлар тўғрисида асосланган маълумот тақдим этиш сўралган.

Маълумот учун, 2025 йилда МТРК фаолияти учун давлат бюджетидан 881,3 миллиард сўм ажратилиши белгиланган (70 миллион доллар). Таққослаш учун, 2024 йилда ушбу тузилмага 555,9 миллиард сўм берилган. Бир йил ичида 322,3 миллиард сўм кўп пул ажратилган. Ўз навбатида МТРКга ажратиладиган пуллар миқдорини ошириб бориш кўзда тутилмоқда. Масалан, 2026 йилда бюджетдан 943 миллиард сўм, 2027 йилда 1 триллион сўмдан ортиқ маблағ бериш режалаштирилган.