Жорий йил 11–13 ноябрь кунлари Geely компанияси Хитойда 10 дан ортиқ давлатдан келган журналистлар учун медиатур ташкил этди. Тадбирда ўзбекистонлик оммавий ахборот воситалари вакиллари қатнашди. Сафар чоғида иштирокчилар Geely Ҳолдинг Group шўба корхонасининг Тадқиқотлар ва ривожланиш марказида бўлди. “Дарё” мухбири марказ вице–президенти Рен Хианг Феи билан суҳбатлашди.
Бугун Хитой электромобиль саоанти бўйича дунёда етакчи. Бу даражага эришишда қайси омиллар ёрдам берди? Янги моделларни яратиш стратегиянгиз қандай?
Хитойда 2023 йилда 9,6 миллионта электромобиль ишлаб чиқарилган бўлиб, шундан 9,5 миллионтаси сотилган. Жумладан, 8,3 миллион дона (85 фоиздан ортиғи) электромобилни ички бозор истеъмолчилари харид қилган.
Умуман олганда, ўтган йили мамлакатда электромобиллар ишлаб чиқариш кўрсаткичи 2022 йилдагига қараганда 35,8 фоиз, сотув ҳажми 37,9 фоиз ўсди. 2023 йилда Хитойда ишлаб чиқарилган электромобиллар улуши глобал савдонинг 60 фоиздан ортиғини ташкил этди.
Масалани Geely фаолияти мисолида таҳлил қилсак. Компаниянинг 2024 йил январидан октябригача бўлган вақтдаги умумий автомобиль сотуви 1,7 миллион донадан ошди. Бу ўтган йилнинг шу давридагига нисбатан 32 фоизга ўсишни англатади. Хорижга экспорт қилинган автомобиллар сони 347 000 донага ошди. Бугунги кунда Geely компаниясида 30 000 нафардан ортиқ илмий–тадқиқот бўйича мутахассислар фаолият юритади. Компаниямиз томонидан охирги 10 йил ичида илмий–тадқиқот ишларига 200 миллиард юандан ортиқ (27,7 миллиард доллар) сармоя киритилди. Албатта, бу сармоялар автомобиллар ишлаб чиқариш тармоғини ривожлантиришга катта ҳисса қўшди дейиш мумкин.
Geely дунёнинг 80 дан зиёд мамлакатларда 800 дан ортиқ савдо ҳамда хизмат кўрсатиш шохобчаларини ташкил этган. Компаниянинг янги ЭХ5 электромобили Хитой бозорида сотувга чиқарилгандан кейин 100 кун ичида 50 000 донадан ортиқ сотилди. Хитой электромобиль саноатининг ўсиши бозорда рақобатни кучайтирмоқда. Мамлакатимиз тажрибаси автотранспорт воситаларини электрлаштиришга глобал ўтишга катта туртки беряпти.
Бугун электромобиль ишлаб чиқаришда Хитойнинг асосий рақобатчилари қайси давлатлар?
Ҳозирда электромобиль бозори доимий ўсиб бормоқда. Кўпроқ истеъмолчилар мазкур шаклдаги транспорт воситаларини харид қилмоқда. Глобал миқёсда турли мамлакатларда таниқли компаниялар электромобиль соноатини ривожлантиришга катта ҳисса қўшяпти.
Geely автомобилсозлик саноатида электрлаштиришга ўтишни сотиш бўйича рақобатдан кўра муҳимроқ деб ҳисоблайди. Бу жараён компания имкониятларини кенг қамровли синовдан ўтказади. Турли бозорлардаги фойдаланувчиларнинг ўзига хос эҳтиёжларини тушуниш ва мослаштирилган маҳсулотлар ҳамда ечимларни тақдим этиш барқарор ривожланишга эришиш учун муҳим.
Хитойда ва бутун дунёда электромобиллар келажаги ҳақида нима дея оласиз?
Глобал электромобиль сотуви 2024 йилда кучли суръатни кўрсатди. БНЕФ маълумотларига кўра, электромобиллар, жумладан аккумуляторли электр ва қўшимчали гибрид автомобиллар сотуви жорий йилда 16,7 миллион донага етди. Ўтган 2023 йилда бу кўрсаткич 13,9 миллионта бўлган. Электромобильлар автомобилсозлик ва энергетика саноатида туб ўзгаришларни кўрсатяпти.
Хитойда электромобилларнинг келажаги истиқболли кўринади. Аккумулятор, автоном ҳайдаш ва бошқа асосий технологияларда давом этаётган инновациялар, эмиссияларни камайтириш ва барқарор ривожланишни рағбатлантириш мажбуриятини олади. Тартибга солинаётган эҳтиёжлар, инсонларда атроф–муҳитга салбий таъсирни камайтириш бўйича хабардорлик оширилиши ва инфратузилма яхшиланиши фонида глобал миқёсда бозор сезиларли даражада ўсиши кутилмоқда. Бироқ, тартибга солиш, инфратузилма ва истеъмолчиларнинг хоҳиш–истакларидаги фарқлар туфайли суръат минтақага қараб фарқ қилиши мумкин.
-SJeAqNiC.jpg)
Автотранспорт воситасининг нархи унинг сифати ва имкониятларига боғлиқ. Бугун Хитойда электромобиллар нархлари қанчадан бошланиб, неча пулгача етади?
Айни пайтда Хитой бозорида ҳар хил турдаги автомобилларни турли нархларда учратиш мумкин. Масалан, Geely Ҳолдинг Group томонидан ишлаб чиқарилган электромобилларни олайлик. Geely ихчам автомобиллардан тортиб ўрта ва катта ҳажмдаги автотранспорт воситаларигача бўлган тоифадаги автомобилларни таклиф этади.
Мисол учун, шаҳарда ҳаракатланиш учун мўлжалланган микро ва арзон электромобилларимиздан бири Geely Панда ҳисобланади. Бундай тоифа учун нархлар тахминан 39 000 юандан (5 386 доллар) 60 000 юангача (8 286 доллар) етади. Яна бир ихчам ва замонавий электромобиль Geely Хингюан нархлари 60 000 юандан 100 000 юангача (13 811 доллар).
Хитойда спорт автомобиллари жуда ҳам машҳур. Уларнинг нархлари тахминан 120 000 юандан (16 573 доллар) 180 000 юангача (24 860 доллар) бўлмоқда. Самарадорлик ва ҳашаматни қадрлайдиган истеъмолчилар учун яратилган премиум электромобиллар ҳам кўп. Масалан, Geely Ҳолдинг Group шўба корхонасига қарашли Зеекр бренди автомобиллари. Жумладан, Зеекр 001 моделининг нархи 250 000 юандан (34 528 доллар) 500 000 юангача (69 057 доллар) етади.
Хитой бозорида ҳашаматли спорт электромобиллари ҳам сотувда мавжуд. Масалан, 2017 йилдан бери Geely компаниясига тегишли бўлган Lotus Хитой бозорига Eletre ва Emeya моделларини тақдим этди. Мамлакатда бундай спорт автомобилларининг нархи тахминан 700 000 юандан (96 679 доллар) бошланади.
Geely 2025 йилда Ўзбекистон бозорига киришни режалаштирмоқда. Ушбу бозорнинг келажаги ҳақида қандай фикрдасиз? Сизнингча, автомобилларга талаб юқори бўладими?
Албатта, бугун автомобилларга талаб юқори. Ўзбекистон бозорида ўрта синф сонининг кўпайиши ва урбанизация тезлигининг ортаётгани таъсирида автомобиллар савдоси барқарор ўсяпти. Маҳаллий ва хорижий брендларга талаб ортган. Чунки истеъмолчилар замонавий, ишончли ва ҳамёнбоп автомобилларни қидирмоқда. Шунинг учун талаб юқори бўлади.
Geely Ўзбекистон бозорига жуда оптимист нуқтайи назаридан қарайди. Гибрид автомобиллар ва электромобиллар саноати ривожланишини қўллаб–қувватлаш учун кўпроқ маҳаллий компаниялар билан ҳамкорлик қилишни интиқлик билан кутмоқдамиз. Биргаликда биз ўзбек истеъмолчилари учун янада оқилона, “яшил” ва сифатли маҳсулотлар тақдим этишни мақсад қилганмиз.
Исломбек Умаралиев суҳбатлашди
Изоҳ (0)