Трамп Россияни “супер-пупер ракета” лойиҳасини ўғирлаганликда айблади

Россия АҚШдан “супер-пупер” ракета лойиҳасини ўғирлаган, деди АҚШ собиқ президенти Дональд Трамп Ню-Хемпширдаги чиқиши чоғида.  

Трампнинг сўзларига кўра, воқеа Барак Обама маъмурияти даврида (2009–2017) содир бўлган.

“Улар махфий лойиҳаларни ўғирлаб, ракета қуришди”, — деди Трамп.

Собиқ президент, шунингдек, америкаликларга Хитой, Эрон ва Россия ракеталарини уриб тушириш учун ўз “Темир гумбаз”и зарурлигини айтди.

“Темир гумбаз” ракетага қарши мудофаа тизими 50 дан 200 километргача парвоз масофасига эга бўлиб, бошқарилмайдиган тактик ракеталардан ҳимоя қилиш учун мўлжалланган тактик тизим. Исроил армияси ҲАМАСга қарши урушда ушбу тизимдан фойдаланмоқда.

Трамп биринчи марта 2020 йилнинг май ойида Қўшма Штатлар ўзининг гипертовушли ракетасини яратишини эълон қилиб, уни “супер-пупер” деб таърифлаганди. Кейинроқ унинг аниқлик киритишича, ракета дунёдаги энг тезкор деб топилган ракетадан 17 баробар тезроқ учади ва 1,6 минг км масофадаги нишонларни ура олади. CNN ракета 2020 йил март ойида синовдан ўтказилганини хабар қилди.

Россия Ташқи ишлар вазирлиги расмий вакили Мария Захарова Трампнинг сўзларига жавобан, Москва АҚШнинг даъволаридан ҳайратда эканини айтди.