2025 йил учун Ўзбекистон давлат бюджети даромадлари 308,5 триллион сўм, харажатлари 344,6 триллион сўм бўлиши кутилмоқда. Бу ҳақда Иқтисодиёт ва молия вазирлиги маълум қилди.
Келаси йилда ижтимоий харажатларнинг аксарият қисмини (47,3 фоиз) таълимга йўналтириш белгиланмоқда. Жумладан, 2025 йилда ушбу соҳага жами 84,3 триллион сўм ажратилади. Шундан:
- Мактабгача таълимга 15,8 триллион сўм;
- Умумий ўрта таълимга 54 триллион сўм;
- Профессионал таълимга 7,8 триллион сўм;
- Олий таълимга 6,7 триллион сўм йўналтирилади.
Таққослаш учун, 2025 йилда таълимга ажратиладиган маблағ миқдори 2024 йилда кутилаётган харажатларга нисбатан 13,2 триллион сўмга кўпроқ бўлади.
Келгуси йилда давлат бюджетидан соғлиқни сақлаш соҳасига 41,2 триллион сўм йўналтириш режалаштирилмоқда. Шу билан бирга, маданият харажатларига 3,8 триллион сўм, жисмоний тарбия ва спорт чиқимларига 3,2 триллион сўм сарфланади. Фан соҳасига эса 2,2 триллион сўм берилади.
2025 йилда ижтимоий ҳимояга 17,3 триллион сўм ажратилиши кўзда тутилмоқда. Бу миқдор 2023 йилдагидан (19,2 триллион сўм) 2 триллион сўмга кам.
2025 йилда иқтисодиётга харажатлар 39,2 триллион сўм бўлиши прогноз қилинган. Бунда қатор соҳаларга маблағлар йўналтирилади, жумладан:
- сув хўжалиги эксплуатацияга 9,7 триллион сўм;
- табиий газ нархларидаги тафовут учун субсидияларга 7 триллион сўм;
- иссиқлик таъминоти корхоналарига субсидияларга 4,8 триллион сўм;
- умумий фойдаланишдаги автомобиль йўлларини сақлашга 3,7 триллион сўм;
- электр энергияси нархларидаги тафовут учун субсидияларга 500 миллиард сўм ажратилади.
Келаси йилда мамлакатда инфратузилмани ривожлантириш харажатларига 27,4 триллион сўм, ижтимоий ва ишлаб чиқариш инфратузилмасини ривожлантириш дастурига 16,1 триллион сўм ажратилади.
Маълумот учун, 2023 йилда давлат бюджети даромадлари 231,7 триллион сўмни, харажатлари 281 триллион сўмни ташкил этган. Хусусан, таълимга 61,2 триллион сўм, соғлиқни сақлашга 31 61,2 триллион сўм, маданият ва спорт 5,3 61,2 триллион сўм сарфланган.
Изоҳ (0)