“Ўзбекистон Республикаси Вазирлар Маҳкамаси тўғрисида”ги конституциявий қонун 25 октябрь куни қабул қилинди.
-9JaiAtXc.jpg)
Унга кўра, Вазирлар Маҳкамаси — ижро этувчи ҳокимиятнинг олий органи бўлиб, иқтисодиётнинг, ижтимоий ва маънавий соҳаларнинг самарали фаолият кўрсатишига раҳбарлик қилишни, конституция ва қонунлар, Олий Мажлис палаталари қарорлари, президент фармонлари, қарорлари ва фармойишлари ижросини таъминлайди.
Вазирлар Маҳкамаси Ўзбекистонда ижро этувчи ҳокимиятнинг ягона тизимига раҳбарлик қиладиган коллегиал органдир. Вазирлар Маҳкамаси ўз фаолиятида Олий Мажлис ва президент олдида жавобгардир. Республика ижро этувчи ҳокимият органларининг яхлит тизимига вазирликлар, қўмиталар, агентликлар ва инспекциялар киради.
Вазирлар Маҳкамаси Ўзбекистон ҳукуматининг аъзолари — бош вазир, унинг ўринбосарлари ва вазирлардан иборатдир. Қорақалпоғистон Республикаси ҳукуматининг бошлиғи Вазирлар Маҳкамаси таркибига ўз лавозими бўйича киради.
Янги таҳрирдаги қонунга кўра, Вазирлар Маҳкамасининг ваколатларига жумладан қуйидагилар киради:
- самарали иқтисодий, ижтимоий, солиқ ва бюджет сиёсати амалга оширилиши, илм-фан, маданият, таълим, соғлиқни сақлашни ҳамда иқтисодиётнинг ва ижтимоий соҳанинг бошқа тармоқларини ривожлантиришга доир дастурларнинг ишлаб чиқилиши ҳамда баҳарилиши учун жавобгар бўлади;
- барқарор иқтисодий ўсишни, макроиқтисодий барқарорликни таъминлаш, камбағалликни қисқартириш, аҳоли учун муносиб турмуш шароитларини яратиш, озиқ-овқат хавфсизлигини таъминлаш, қулай инвестициявий муҳитни яратиш, ҳудудларни комплекс ва барқарор ривожлантириш бўйича чоралар кўради;
- аҳолини, шу жумладан ногиронлиги бўлган шахсларни ижтимоий ҳимоя қилиш тизимининг самарали фаолият кўрсатишини таъминлайди;
- атроф-муҳитни муҳофаза қилиш, табиий бойликларни ва билологик хилма-хилликни сақлаш, иқлим ўзгаришига, эпидемияларга, пандемияларга қарши курашиш ҳамда уларнинг оқибатларини юмшатиш соҳаларида ягона давлат сиёсати амалага оширилишини таъминлайди.
Қонун расмий эълон қилинган кундан эътиборан кучга кирди.
2024 йилнинг февралида ушбу қонун лойиҳаси дастлабки тарзда кўриб чиқилганди. У 55 моддадан иборатлиги, Янги таҳрирдаги Конституциядан келиб чиқиб, ҳукуматнинг иқтисодиёт, бюджет, молия, солиқ, экология ва атроф-муҳитни муҳофаза қилиш соҳаларидаги ваколатлари қайта кўриб чиқилаётгани маълум қилинганди.
Сенатнинг 15 август куни бўлиб ўтган ялпи мажлисида “Ўзбекистон Республикаси Вазирлар Маҳкамаси тўғрисида”ги конституциявий қонун маъқулланди. Мазкур қонун ҳукумат фаолиятини янги таҳрирдаги Конституцияга мувофиқлаштириш ва унинг замонавий шароитда самарали ишлашини таъминлашга қаратилган.
Изоҳ (0)