Монголиянинг аҳоли жон бошига ялпи ички маҳсулоти 2021 йилдан қарийб икки баравар кўпаяди, 2025-йилда эса 8000 долларга етади. Бу ҳақда мамлакат бош вазир Лувсаннамсраин Оюн-Эрдене бошчилигида бюджет сиёсатига бағишлаб ўтказилган учрашувда молия вазири Болдин Жавхлан маълум қилди.
Монголиянинг 2022 йилдан 2025 йилгача бўлган даврда экспорт кўрсаткичлари 63,3 миллиард долларга етади ва аҳоли жон бошига ялпи ички маҳсулот деярли икки баробарга ошади – 2021 йилдаги 4657 доллардан 2025 йилда 8 минг долларгача. Шу билан бирга, Молия вазирлиги келаси йил бюджетини қисқартиришнинг учта вариантини ўрганмоқда, деди молия вазири.
Бош вазир келгусида дефицитсиз бюджетни қабул қилишга эътибор қаратиш лозимлигини, бунда асосий даромад ҳанузгача фойдали қазилмалардан, биринчи навбатда, кўмир қазиб олиш ва экспорт қилишдан келаётганини эслатди.
“Дунёда кўмирдан воз кечиш ва яшил иқтисодиётга ўтиш тенденцияси мавжуд, шунинг учун биз кўмир экспорти қисқаришига эътибор қаратишимиз керак”, деди Монголия ҳукумати раҳбари.
Ўзбекистонда ЯИМ қанча?
2023 йилда Ўзбекистон ялпи ички маҳсулоти (ЯИМ) илк бор 1 квадриллион 66 триллион 569 миллиард сўмни ташкил этди. Бу ҳақда Статистика агентлиги ҳисоботида маълумот берилган.
Ўтган йилда мамлакат ЯИМ ҳажми 6 фоиз ўсиб, 90,9 миллиард долларга (ўртача алмашув курси 11,737 сўм) етди. Бу рақам аҳоли жон бошига ҳисоблаганда 2,5 минг доллардан тўғри келади.
Шунингдек, Статистика агентлигининг хабар беришича, 2024 йилнинг январь–июнь ойлари якунларига кўра, аҳоли жон бошига ҳисобланган ялпи ички маҳсулот ҳажми 15 347,9 минг сўмни (ёки 1 221,3 АҚШ доллари эквивалентида) ташкил этган.
Изоҳ (0)