Соғлиқни сақлаш вазири Асилбек Худаяровнинг айтишича, белгиланган талабларга жавоб берадиган шифокорлар юқори иш ҳақи олмоқда.
Статистика агентлиги маълумотларига кўра, 2024 йил январь–сентябрь ойларида Ўзбекистонда ўртача ойлик иш ҳақи миқдори 5 миллион 151 минг сўмга етди. Мазкур даврда мамлакатда соғлиқни сақлаш ходимлари бошқа соҳадагиларга қараганда энг кам ўртача ойлик иш ҳақи олган – 3,3 миллион сўм. Яъни бу миқдор республика миқёсида белгиланган ўртача ойлик иш ҳақидан кескин паст.
Тошкент шаҳрида 17–25 октябрь кунлари ўтказилган “Халқаро ҳамкорлик ташаббуслари ҳафталиги” доирасида соғлиқни сақлаш соҳаси бўйича ҳам мулоқотлар ташкил этилди. Тадбир якунида соғлиқни сақлаш вазири Асилбек Худаяров “Дарё” мухбирининг шифокорлар ойлиги нега камлиги тўғрисидаги саволига жавоб қайтарди. Вазирлик раҳбарининг айтишича, тегишли шартларни бажарган шифокорларга юқори ойлик тўланмоқда.
“Тиббиёт муассасаларида KPI тизими йўлга қўйиляпти. Ҳозир бирламчи бўғинда режалаштираётган ишларимиз бор. Ойлик масаласига тўхталсак, тиббиёт ходимларига 7 турдаги имтиёзлар берилган. Баъзиларига тўхталиб ўтаман. Масалан, юқори малакали мутахассислар учун ойлик иш ҳақига 75 фоизлик устамалар белгиланган. Узоқ ҳудудларга бориб ишлайдиган мутахассислар учун ҳам устамалар бор. Хусусан, Қорақалпоғистоннинг 6 та туманига бориб ишлаган шифокорлар ойлигига 100 фоизлик, Мўйноқда фаолият юритаётганларга 200 фоизлик устамалар берилиши белгиланган. Бундан ташқари, илмий салоҳияти бўйича ҳам устамалар мавжуд. Жумладан, тиббиёт фанлари номзоди 30 фоизлик, тиббиёт фанлари доктори учун 60 фоизлик устамалар қўйилган”, деди вазир.
Асилбек Худаяров мамлакат соғлиқни сақлаш соҳасига янги тизим жорий этиш ишлари кетаётганини ҳам айтиб ўтди.
“Биз давлат бюджет хизматлари билан бирга аҳолига кўрсатилаётган сервис хизматларини кучайтирмоқчимиз. Бу жараён 2024 йил якуни ва 2025 йилда ишга тушади. Яъни энг чекка туманларда ҳам аралаш турдаги хизмат кўрсатиш тизими йўлга қўйилади. Хизматлар давлат бюджети томонидан кафолатли амалга оширилади. Сервис хизмати эса қўшимча бўлади. Сервис хизматида иштирок этадиган шифокорлар, ҳамширалар, санитар ходимлар ва бошқа ишчилар базавий ойлигига олинадиган даромаддан қўшимча пуллар тўланиши таъминланади”, деди вазирлик расмийси.
Аввалроқ вазир мамлакатда юз берган “Док-1 Макс” фожеаси сабаб ногирон бўлиб қолган болалар давлат томонидан тиббий хизмат кўрсатилаётганини айтганди. Кейин фарзанди 2022 йил декабрь ойида “Док-1 Макс”дан заҳарланган ва 65 кун комада ётган фуқаро Феруз Нуритдинов вазир жамоатчиликка ёлғон маълумот берганини айтиб чиқди. Нуритдиновга кўра, унинг фарзанди ҳолидан давлат бирорта шифохонаси шифокори, бирор марта ҳам хабар олмаган.
Изоҳ (0)