2025-yil uchun O‘zbekiston davlat byudjeti daromadlari 308,5 trillion so‘m, xarajatlari 344,6 trillion so‘m bo‘lishi kutilmoqda. Bu haqda Iqtisodiyot va moliya vazirligi maʼlum qildi.
Kelasi yilda ijtimoiy xarajatlarning aksariyat qismini (47,3 foiz) taʼlimga yo‘naltirish belgilanmoqda. Jumladan, 2025-yilda ushbu sohaga jami 84,3 trillion so‘m ajratiladi. Shundan:
- Maktabgacha taʼlimga 15,8 trillion so‘m;
- Umumiy o‘rta taʼlimga 54 trillion so‘m;
- Professional taʼlimga 7,8 trillion so‘m;
- Oliy taʼlimga 6,7 trillion so‘m yo‘naltiriladi.
Taqqoslash uchun, 2025-yilda taʼlimga ajratiladigan mablag‘ miqdori 2024-yilda kutilayotgan xarajatlarga nisbatan 13,2 trillion so‘mga ko‘proq bo‘ladi.
Kelgusi yilda davlat byudjetidan sog‘liqni saqlash sohasiga 41,2 trillion so‘m yo‘naltirish rejalashtirilmoqda. Shu bilan birga, madaniyat xarajatlariga 3,8 trillion so‘m, jismoniy tarbiya va sport chiqimlariga 3,2 trillion so‘m sarflanadi. Fan sohasiga esa 2,2 trillion so‘m beriladi.
2025-yilda ijtimoiy himoyaga 17,3 trillion so‘m ajratilishi ko‘zda tutilmoqda. Bu miqdor 2023 yildagidan (19,2 trillion so‘m) 2 trillion so‘mga kam.
2025-yilda iqtisodiyotga xarajatlar 39,2 trillion so‘m bo‘lishi prognoz qilingan. Bunda qator sohalarga mablag‘lar yo‘naltiriladi, jumladan:
- suv xo‘jaligi ekspluatatsiyaga 9,7 trillion so‘m;
- tabiiy gaz narxlaridagi tafovut uchun subsidiyalarga 7 trillion so‘m;
- issiqlik taʼminoti korxonalariga subsidiyalarga 4,8 trillion so‘m;
- umumiy foydalanishdagi avtomobil yo‘llarini saqlashga 3,7 trillion so‘m;
- elektr energiyasi narxlaridagi tafovut uchun subsidiyalarga 500 milliard so‘m ajratiladi.
Kelasi yilda mamlakatda infratuzilmani rivojlantirish xarajatlariga 27,4 trillion so‘m, ijtimoiy va ishlab chiqarish infratuzilmasini rivojlantirish dasturiga 16,1 trillion so‘m ajratiladi.
Maʼlumot uchun, 2023-yilda davlat byudjeti daromadlari 231,7 trillion so‘mni, xarajatlari 281 trillion so‘mni tashkil etgan. Xususan, taʼlimga 61,2 trillion so‘m, sog‘liqni saqlashga 31 61,2 trillion so‘m, madaniyat va sport 5,3 61,2 trillion so‘m sarflangan.
Izoh (0)