Россиянинг Новгород вилоятидаги М-11 федерал магистрал йўлида 42 та машина тўқнашиши оқибатида йирик ЙТҲ содир бўлди. Бу ҳақда “РИА Новости” хабар берди.
Ҳодиса оқибатида бир киши ҳалок бўлди, беш киши жароҳат олди ва касалхонага ётқизилди. ЙТҲ қор билан қопланган М-11 “Нева” федерал автомагистралида иккита юк машинасининг тўқнашуви билан бошланган. Шундан сўнг орқадан келаётган машиналар тўқнашган. Тирбандлик бир неча километрга чўзилган. Москвага олиб борувчи йўл тўсиб қўйилган. Ҳодиса маҳаллий вақт билан соат 11:20 да содир бўлган. Қутқарув иши кучли қор ёғиши ва бўрон туфайли мураккаблашмоқда, бундан ташқари, юк машиналаридан биридан битум оқиб чиқмоқда.
“М-11 автомагистралида тўрт километрлик тирбандлик юзага келди. Вазият юк машиналарининг айлана олмаётгани сабабли оғирлашмоқда. Ҳозирда ЙТҲда 42 та машина иштирок этгани қайд этилди. Ҳужжатлар расмийлаштирилмоқда, бунинг учун бир неча кун керак бўлади. Чунки авария иштирокчилари кўп”, — дейилади расмий хабарда.
ЙТҲнинг барча иштирокчилари йўл инспекторлари томонидан рўйхатга олинмагунича, автомобиль йўли очилмайди. Москва йўналишидаги федерал магистралда ҳаракат тўсиб қўйилган. Бошқа йўллар бўйлаб айланма йўл ташкил қилинган, аммо ҳозир у ерда ҳам тирбандлик юзага келган. Чунки у йўллар ҳам қордан тозаланмаган. ЙТҲ юзасидан жиноий иш очилган.
Изоҳ (0)