19 август куни Жондор туманидан ўтувчи «А-380» автомобиль йўлининг 368-километрида ҳаракатланиб бораётган, Тожикистон фуқароси Алижон Афғоновга тегишли бўлган Mercedes-Benz Sprinter русумли микроавтобус ағдарилиб, йўл-транспорт ҳодисаси рўй берган. Бу ҳақда «Дарё»га Бухоро вилоят ИИБ матбуот хизмати маълум қилди.
Ҳодисага микроавтобуснинг орқа ўнг шинаси ёрилиб кетиши сабаб сифатида кўрсатилмоқда. Автобус салонида 2 нафар ҳайдовчи ҳамда 16 нафар йўловчи бўлган.
ЙТҲ соат 14:55 да содир бўлган. Республика шошилинч тиббий ёрдам илмий маркази Бухоро филиалига хабар етказилгач, соат 15:00 да 8 та тез ёрдам машинаси йўлга чиққан. Жондор туманидан ўтувчи «А-380» автомобиль йўлида носозлик борлиги сабаб автоҳалокат содир бўлган 60 километр узоқликдаги масофага тез ёрдам машинаси соат 15:30 да етиб борган.
Автобусда бўлган 18 кишининг 8 нафари енгил ва 1 нафари ўта оғир жароҳат олган. Улар Газли шаҳарчасидаги тиббиёт бўлимига олиб борилган ва биринчи тиббий ёрдам кўрсатилган. Шундан сўнг барча беморлар Республика шошилинч тиббий ёрдам илмий маркази Бухоро филиалига олиб келинган.
Ўта оғир жароҳат олган, 1990 йилда туғилган Зокиржон Латифзода Гулмахмад кома ҳолатида эканлиги айтилмоқда. Айни пайтда бу бемор устида тиббий муолажалар олиб борилмоқда.
— Ўзбекистонликлар юртдан йироқда ҳалокатга учраганимизни сездиришмади. Бугун автоҳалокатда ўта оғир жароҳатланган бир шеригимиздан ташқари ҳаммамиз Тожикистон сари йўл оляпмиз. Ўзимиз учун алоҳида микроавтобус, юкларимиз учун алоҳида автомашина ажратилиб, Тожикистон чегарасигача йўл-патрул хизмати ҳам йўлга қўйилди. Бир нафар шифокор ҳам бизга ҳамроҳ бўлиб кетаяпти. Оиламиз бағрига соғ-саломат етиб боришимизни таъминлаган, чин дилдан дўстона кўмагини аямаган ўзбекистонликларга ва шифокорларга ташаккуримизни билдирамиз,—деди тожикистонлик йўловчи Қутбиддин Мизробов.
Аниқланишича, йўловчиларнинг барчаси Россия Федерациясига борган мигрантлар бўлиб, Москва шаҳридан йўлга чиққан ва Ўзбекистон орқали Тожикистонга ўтмоқчи бўлган.
Ҳолат юзасидан вилоят ИИБ ҳузуридаги Тергов бошқармаси томонидан ЖКнинг 266-моддаси 1-қисми билан жиноят иши қўзғатилган ва тергов ҳаракатлари олиб борилмоқда.
Эслатиб ўтамиз, олдинроқ ҳам шу туман ҳудудидан ўтувчи йўлда Қозоғистон фуқароси бошқарган автобус ағдарилган ва бир киши ҳалок бўлганди.
Изоҳ (0)