Россиянинг Пенза вилоятида йўл-транспорт ҳодисаси оқибатида саккиз нафар ўзбекистонлик ҳалок бўлгани тўғрисида хабар берилганди. ФВВнинг маълум қилинишича, марҳумларнинг жасади Урганч шаҳрига олиб келинган.
.jpg)
11 январь куни Пенза вилоятида JAC русумли микроавтобус қарама-қарши йўлга чиқиб кетиши оқибатида Volvo юк машинаси билан тўқнашди. Микроавтобус ичида кетаётган Ўзбекистон фуқароларининг 8 нафари ҳалок бўлди.
Фавқулодда вазиятлар вазирининг биринчи ўринбосари бошчилигида ташкил этилган ишчи гуруҳ 12 январь куни Пенза вилоятига етиб бориб, Россиянинг масъул идоралари раҳбарлари билан учрашган ва ҳамкорлик асосида ташкилий ва амалий ҳаракатлар олиб борилган. Шундан сўнг махсус борт Россиядан учиб, 13 январь куни соат 06:50 ларда Хоразм вилоятидаги Урганч халқаро аэропортига келиб қўнган.
Таъкидланишича, Россия масъуллари юзага келган мазкур бахтсиз ҳодиса оқибатларини зудлик билан бартараф этиш, жароҳатланганларга тез тиббий ёрдам кўрсатишда яқиндан кўмак берган.
Жароҳатланган фуқароларнинг бир нафари 12 январь куни тонгги вақтда Пенза шаҳридаги шифохонада шифокорларнинг муолажаларига қарамасдан вафот этган.
“Фавқулодда вазиятлар, Ички ишлар, Ташқи ишлар, Соғлиқни сақлаш ва Транспорт вазирликлари ҳамкорлигида 8 нафар вафот этган фуқароларнинг жасадлари яшаш манзилларига юборилди. Ҳозирда маҳаллий ҳокимликлар томонидан дафн маросимларини ўтказиш юзасидан тайёргарлик ишлари олиб борилмоқда”, — дейилади хабарда.
Жароҳатланган яна бир нафар фуқаро Пенза шаҳридаги касалхонада, даволаниш ишлари якунига етгандан сўнг Ўзбекистонга қайтарилади. Ҳозирги вақтда касалхонага жойлаштирилган фуқаро шифокорларнинг қатъий назоратига олиниб, тегишли муолажалар ўтказилмоқда.
Аввалроқ Санкт-Петербургда 49 ёшли Ўзбекистон фуқароси қурилиш майдончасида йиқилиб, касалхонага ётқизилганди. Эркак Москва шоссесида ангарларда ишлаётган вақтда баландликдан йиқилиб тушган. Эркак бошнинг очиқ жароҳати, мия шиши, бош мия контузияси ва бошқа оғир жароҳатлар билан касалхонага ётқизилган.
Изоҳ (0)