Россиядан Ўзбекистонга келаётган йўловчи автобус ағдарилиб кетгани ҳақида хабар берилган эди. Ўзбекистон Транспорт вазирлиги ҳолат юзасидан маълумот бериб, у Ўзбекистонга эмас, Қозоғистонга йўл олган автобус бўлганини билдирди.
Вазирлик матбуот хизмати хабарига кўра, ЙТҲ 22 февраль куни Оренбург—Қозон трассасида содир бўлган. Ҳайдовчи ҳаракат вақтида бошқарувни йўқотиши натижасида автобус ариққа ағдарилиб кетган. Автобусда 29 нафар йўловчи, шу жумладан, тўрт нафар бола бўлган. Ҳодиса оқибатида ҳеч ким ҳалок бўлмаган.
Ушбу автобус Қозоғистонда рўйхатга олинган бўлиб, буюртма асосида Кострома – Чимкент йўналиши бўйича йўловчиларни олиб кетаётган бўлган. Автобус йўловчилари орасида Ўзбекистон фуқаролари бўлмаган.
Россия ФВВ Оренбург вилоят бошқармаси томонидан автобус йўловчилари дастлаб маҳаллий маданият уйига жойлаштирилган. Йўловчилар тез ёрдам ходимлари томонидан тиббий кўрикдан ўтказилган. Шундан сўнг йўловчилар бошқа автобусда ҳаракатланишни давом эттирган.
Изоҳ (0)