АҚШ президенти Жо Байден Тайванга қурол етказиб бериш ва бошқа ҳарбий ёрдам учун 567 миллион доллар ажратишни буюрди. Бу ҳақда Оқ уй сайтида чоп этилган пресс-релизда айтилади.
“Қўшма Штатлар Конституцияси ва қонунлари бўйича менга президент сифатида берилган ваколатга кўра, мен давлат котибига Тайванга ёрдам учун Пентагоннинг мудофаа маҳсулотлари ва хизматлари, шунингдек, ҳарбий таълим ва кадрлар тайёрлаш учун 567 миллион долларгача маблағ ажратишни буюраман”, дейилади ҳужжатда.
2023 йилда АҚШ Тайванга 345 миллион доллар миқдорида ҳарбий ёрдам ажратди. Шунингдек, жорий йил июнь ойида АҚШ Тайванга 300 миллион долларга дронлар сотишни маъқуллади.
Хитой Тайванни ўз ҳудуди деб ҳисоблайди ва Америка ҳукуматининг бундай ҳаракатларини бир неча бор танқид қилган. Хитой Мудофаа вазирлиги Қўшма Штатларни Тайван билан "ҳарбий тил бириктиришни" тўхтатишга чақирди.
Аввалроқ Хитой АҚШдан "ягона Хитой" тамойилига амал қилишни сўрагани хабар қилинганди.
Хитой ташқи ишлар вазири Ван Ининг фикрича, бу Вашингтон ва Пекин ўртасидаги дипломатик муносабатларнинг асосидир.
“Агар Қўшма Штатлар ҳақиқатан ҳам Тайван бўғозида тинчлик ва барқарорликка умид қилса, у "ягона Хитой" тамойилига риоя қилиши, учта қўшма коммюникени амалга ошириши, Тайванни қуроллантиришни тўхтатиши, "Тайван мустақиллиги"га оммавий равишда қарши чиқиши ва Хитойнинг тинч йўл билан бирлашишини қўллаб-қувватлаши керак”, деди Ван И АҚШ давлат котиби Энтони Блинкен билан БМТ Бош Ассамблеясининг 79-сессияси доирасидаги учрашувда.
Изоҳ (0)