АҚШ Давлат котиби Энтони Блинкен ўт очишни тўхтатиш келишувини тезлаштириш мақсадида Яқин Шарққа ташриф буюради. Бу ҳақда АҚШ Давлат департаменти матбуот хизмати тарқатган хабарга асосланиб, CNN нашри хабар берди.
Манбада айтилишича, АҚШ келишувга эришиш йўлида Исроил ва ҲАМАСга босим ўтказмоқчи. Ушбу йўналишдаги илк ҳаракат ҳарбий ҳаракатлардан танаффус эълон қилиш ҳамда асирларни алмашишга қаратилади.
Давлат департаменти матбуот котиби Метю Миллер Блинкеннинг сафарини тасдиқлаган. Давлат котиби Яқин Шарққа: Миср, Исроил, Иордания ва Қатарга “барча гаровга олинганларнинг озод этилишини таъминлайдиган ўт очишни тўхтатиш келишувига эришиш зарурлигини муҳокама қилиш учун” бориши айтилган.
“Биз ҲАМАСнинг АҚШ чақирувларига имкон қадар тезроқ жавоб беришига умид қиламиз ва кутишда давом этамиз”, — деган Метю Миллер пайшанба куни бўлиб ўтган матбуот брифингида.
АҚШ расмийлари ўт очишни тўхтатиш борасида Қатар орқали ҲАМАС сиёсий қанотига мурожаат юборганини айтган. Ташкилот расмийлари сўровни ҳали кўриб чиқаётгани боис ҳозирчалик уни жавобсиз қолдирган.
Манбага кўра, Блинкен учрашувларда сулҳни тўхтатиш таклифи исроилликлар ва фаластинликларга қандай фойда келтиришини муҳокама қилади. Ғазодаги азоб-уқубатларни енгиллаштириш, инсонпарварлик ёрдамини кескин кўпайтириш ва фаластинликларнинг ўз маҳаллаларига қайтишига имкон бериш масалалари кўриб чиқилади.
“Сафар Исроилнинг шимолий чегарасида осойишталикка эришиш имкониятини очади. Исроиллик ва ливанлик оилалар ўз уйларига қайтишлари мумкин бўлади. Исроил ва унинг араб қўшнилари ўртасида янада интеграциялашув, Исроилнинг узоқ муддатли хавфсизлигини мустаҳкамлаш ва барқарорликни яхшилаш учун шарт-шароит яратади. Саъй-ҳаракатларимиз минтақа бўйлаб можаронинг янада кучайишига йўл қўймаслик зарурлигини яна бир бор таъкидлайди”, — деган Метю Миллер.
АҚШ расмийлари Блинкен “Ҳизбуллоҳ” ва “Ансоруллоҳ” вакиллари билан учрашиши ёки учинчи томон орқали уларга хабар йўллаб, ҳужумларни тўхтатишни сўраши мумкинлиги ҳақида маълум қилган
Изоҳ (0)