АҚШ Исроилга 20 млрд долларлик қурол-яроғ ажратиш тўғрисидаги савдо пакетини маъқуллади

АҚШ ҳукумати 13 август куни Исроилга 20 миллиард долларлик қурол сотиш тўғрисидаги битимни маъқуллаган. Бу ҳақда Reuters нашри хабар берди.

10 ойдан ортиқ вақтдан бери давом этаётган Яқин Шарқ операциясида Исроилни қўллаб-қувватлаш ва ҳарбий устунлик кучи билан урушни тезроқ тугатиш мақсадида сўнгги келишув тасдиқланган. Эндиликда АҚШдан Исроилга ёрдам пакетлари бўлмаслиги, қурол-яроғ келишувлари савдо пакети форматига ўтказилиши хабар берилган.

Савдо пакети замонавий қирувчи самолётлар, мудофаа тизимлари ва ўрта масофали ракеталарни ўз ичига олиши хабар берилган. Савдо битимининг тўлиқ тафсилотлари очиқланмаган. Пентагон ҳарбий техникаларни қачон етказиб бериши ҳам ҳозирча аниқ эмас.

“ АҚШ давлат котиби Энтони Блинкен қарийб 19 миллиард долларлик F-15 самолётлари ва жиҳозлари, 774 миллион долларлик танк патронлари, 60 миллион долларлик портловчи миномёт патронлари ва 583 миллион долларлик армия машиналари сотилишини маъқуллади. Пакетда ,шунингдек, бошқа ҳужум ва мудофаа тизимлари бўлади”, дейилади Пентагон баёнотида.

Пентагоннинг айрим аноним манбалари F-15 лар 2026 йилнинг бошида етказиб берилишини айтган. Исроил билан боғлиқ хавфсизлик ҳолатининг ўзгаришига қараб бу муддат олдинга сурилиши ҳам мумкин.

“Қўшма Штатлар Исроил хавфсизлигини таъминлаш тарафдори ва Исроилга ўзини-ўзи мудофаа қилиш қобилиятини ривожлантириш ва сақлаб туришда ёрдам беради. Бу АҚШ миллий манфаатлари учун ҳам жуда муҳимдир”, дейилган Пентагон баёнотида.

Исроил мудофаа вазири Йоав Галлант Х тармоғидаги постида АҚШ расмийларига Исроилга “минтақадаги сифатли ҳарбий устунлигини” сақлаб қолишда ёрдам бергани ва Исроил хавфсизлигига содиқлиги учун миннатдорчилик билдирган. Бу ҳамкорлик янги суръатда давом этишига умид билдирган.

Манбаларга кўра, АҚШ июнь ойидан бери Исроилга 10 000 дан ортиқ ўта вайрон 2000 фунтли бомбалар ва минглаб Hellfire ракеталарини юборган. Бироқ Ғазода бу каби қуроллар жуда кам ҳолатда қўлланмоқда. Таҳлилчилар Исроил Эрон ва унинг ҳамкорлари ҳужумига муносиб қарши туриш учун улкан ҳарбий омбор шакллантираётган бўлиши мумкинлигини тахмин қилган.