2024 йил 29-октябрь куни ADM Global компаниялар гуруҳига кирувчи ADM Jizzakh автомобиль заводи етакчи шина ишлаб чиқарувчи корхонаси – Биринчи Резинотехника Заводи билан ҳамкорлик тўғрисида битимни тузди.
Янги ҳамкорлик доирасида Биринчи Резинотехника Заводи ADM Jizzakh тўлиқ циклли заводида ишлаб чиқарилаётган Kia Sonet модели учун шиналар етказиб беришни бошлайди. Заводга икки хил таснифдаги шиналар – 215/60Р16 ва 195/65Р15 келтирилади. Ушбу ўлчамлар замонавий автомобилларда кенг тарзда қўлланилиши лойиҳанинг стратегик аҳамиятини кўрсатади.
Мазкур компаниялар ўртасидаги ҳамкорлик ишлаб чиқаришни маҳаллийлаштириш дастурини амалга оширишга қаратилган бўлиб, импорт қилинадиган бутловчи қисмларга боғлиқликни қисқартиришга имкон беради. Маҳаллий ишлаб чиқарувчиларни қўллаб-қувватлаш нафақат иқтисодиётнинг барқарор ривожланишига ҳисса қўшади, балки Ўзбекистонда ишлаб чиқарилган автомобилларнинг рақобатбардошлигини оширади.
Маълумот: ADM Jizzakh – 2021 йилда Kia, Лада ва Renault каби брендларнинг автомобилларини йирик узелли йиғиш (СКД) билан ўз фаолиятини бошлаган Ўзбекистондаги биринчи хусусий автомобиль заводидир.
Кейинчалик завод портфолиоси Chery ва Haval брендлари билан тўлдирилди. 2024 йил март ойида ишлаб чиқаришнинг тўлиқ циклига эга (CKD) заводи ишга туширилди, максимал маҳаллийлаштириш даражасига эга биринчи автомобиль эса Kia Sonet модели бўлди. Тўлиқ циклли заводнинг ишлаб чиқариш қуввати йилига 100 000 дона автомобиль ташкил этади.
ADM Jizzakh 75 гектар майдонда жойлашган бўлиб, у ерда нафақат ишлаб чиқариш қувватлари, балки автомобиль бутловчи қисмларини етказиб берувчилар кластери ҳам жойлашган. Ишлаб чиқаришни маҳаллийлаштириш ўриндиқлар, прессланган панеллар, олд ва орқа бамперлар, электрон ва электр бутловчи қисмлар, шунингдек, ички ва ташқи қисмнинг пластик элементлари каби кенг турдаги қисмларни қамраб олади.
Биринчи босқичда маҳаллийлаштириш даражаси, келгусида 40-45 фоизгача ошириш режаси билан 30 фоизга етказилади. ADM Jizzakh ISO 9001 сертификатига эга. Завод хорижий ҳамкорлар билан фаол ҳамкорлик қилмоқда. Машинакомплектлар ва бутловчи қисмларни мунтазам етказиб бериш Корея, Хитой, Ҳиндистон, Россия ва бошқа мамлакатлардан амалга оширилмоқда, бу ўз навбатида ишлаб чиқариш жараёнларининг барқарорлиги ва мослашувчанлигини таъминлайди. ADM Jizzakh нафақат ўз ишлаб чиқаришини ривожлантиришга, балки маҳаллийлаштириш ва рақобатбардошликни оширишга ҳисса қўшиш орқали маҳаллий автомобиль бутловчи қисмларини ишлаб чиқарувчиларни қўллаб-қувватлашга интилади.
“Биринчи Резинотехника Заводи” МЧЖ 2014 йилда Ўзбекистон Республикаси Президентининг 2014 йил 4 декабрдаги ПҚ-2269-сонли “«Ангрен» эркин иқтисодий зонаси ҳудудида резинотехника буюмлари заводи қурилишини ташкил этиш чора-тадбирлари тўғрисида”ги қарори асосида ташкил этилган. Завод Марказий Осиёда автомобиль ва қишлоқ хўжалиги шиналари ягона ишлаб чиқарувчиси ҳисобланади. Завод ассортиментида юқори сифатли конвеер ленталари ҳам мавжуд. Барча маҳсулотлар халқаро стандартларга жавоб беради ва ISO 9001:2015, ISO 50001:2018, ИАТФ 16949:2016 сифат тизими доирасида сертификатланган, шунингдек, EC117 ва EC-30 сертификатларига эга.
Завод маҳаллий ишлаб чиқаришни ривожлантиришни фаол қўллаб-қувватламоқда ва ўз маҳсулотларини Ўзбекистондан ташқарига экспорт қилмоқда. 2018 йил июль ойидан бошлаб заводда 21 хил ўлчамдаги 3 миллион дона автомобиль шинаси, 2 хил ўлчамдаги 200 минг дона қишлоқ хўжалиги шинаси ва 30 хил турдаги резина-мато ва резина-трос материалларини ўз ичига олган 100 минг погон метр конвеер ленталари ишлаб чиқариш йўлга қўйилди.
Реклама ҳуқуқи асосида
Изоҳ (0)