Украина ва Россия энергетика инфратузилмасига икки томонлама зарбаларни тўхтатиш бўйича “дастлабки муҳокамаларни” олиб бормоқда. Бу ҳақда Financial Times хабар берди.
Маълум қилинишича, Украина Курск вилоятида жанговар ҳаракатларни бошлаганидан сўнг тўхтатилган музокараларни Қатар воситачилигида қайта тиклашга уринмоқда. Аноним дипломат “жуда эрта босқичдаги” музокаралар олиб борилаётганини тасдиқлаган. У муҳокамалар энергетика объектларига тааллуқли эканини таъкидлаган.
Украинанинг юқори мартабали амалдори сўнгги ҳафталарда Украина ва Россия эришилган келишув доирасида энергия объектларига “ҳужумлар сонини камайтиргани”ни айтган. Россиялик мулозим эса Курск вилоятидан Украина армиясини сиқиб чиқармагунча, Путин келишувга рози бўлиши даргумонлигини билдирган.
“Украина Россияни музокараларга ундаш учун Россия объектларига, хусусан, нефтни қайта ишлаш заводларига зарба беришни давом эттирмоқчи”, деди нашрнинг Украина расмийлари орасидаги манбаси.
Маълумотларга кўра, ҳозирда Украина армияси Россия ҳудудининг тахминан 600 квадрат километрини назорат қилмоқда. Қатар июнь ойида Украина президенти Владимир Зеленский ташаббуси билан Швейцарияда тинчлик саммити ўтказилгандан сўнг Россия билан музокараларда воситачилик қила бошлаган.
Изоҳ (0)